Moscow, Naitung:
Ym duna ia ka 140 ngut ki briew ki la mynsaw ha ka thaiñ Shatei Lam Mihngi jong ka Russia ha ka Lah Sngi U Blei haba kawei ka rel kaba kit ia kumba 800 ngut ki nongleit jingleit, ka la iatyngkhuh bad kawei pat ka trok ha ka jingiaid lynti na katei kajuh ka jaka.
La ong ba ka daw jong kane ka jingjia ka dei hadien ba katei ka rel kaba mih na Kazan jong ka Tatarstan ban leit sha Adler kaba don ha ki bynta jong ka Black Sea, kam lah shuh ban sangeh kynsan namar dei katei ka trok kaba la pynkheiñ ïa ki kyndon ïaid lynti bad kaba la leit rung sha katei ka lynti ïaid rel wat haba ki tnat pynïaid rel ki la bthah ia ka jingmaham.
Kumta la ong ba katei ka rel, ka la leit tynrah beit-beit ia katei ka trok ha ka jingstet kumba 65 kph (40 mph) hajan ka stashon rel ha Kotelnikovo, kaba don sha ki thaiñ Volgograd, kumba 1,200 km (750 miles) na ka phang Shathie jong ka nongbah Moscow ba heh duh jong ka Russia.
Ha katei ka jingjia, la ong ba palat 140 ngut kiba shong ha katei ka rel ki la mynsaw. Napdeng kine, 15 ngut ki kynthup ia 3 ngut ki khynnah, ki dei kiba la kham mynsaw jur bad la pynkit noh ia ki mar-mar sha ka hospital kaba kham hajan tam ban ioh ia ka jingsumar ba kyrkieh.
