New Delhi, Nailar:
Kumba la ïoh jingtip na ka jingbuddien la ong ba ki la don kumba 20 ngut ki briew kiba la jah rngai hadien ka jinghap jong u slap uba jur ha Rampur kaba don ha Shimla. Ki bor pynïaid distrik ki la ong ba ki bor ba dei khmih ha kum kine ki jingjia ki la ïohpdiang ïa ki khubor kiba ktah ïa ki briew na ka daw jong ka jingjur palat jong u slap kaba la jia hajan kawei ka projek pynmih bording ha Samej Khad hynnin ka step. Ka kynhun ba dei khmih bad ai jingïarap ka la leit bran bran sha katei ka jaka na ka bynta ban leit pyllait im ïa ki briew ha ryngkat ki heh ba dei khmih, kynthup u Deputy Commissioner Anupam Kashyap bad u heh pulit jong ka distrik u Sanjeev Gandhi.
U Kashyap u la ong, “Katkum ka jingtip kaba ngi la ïoh, la ïathuh ba ki la don kumba 20 ngut ki briew kiba la jah na ka jaka ba la shah ktah ha ka jingshlei um.”Ka jingjur slap ka la ktah ruh ïa ka jingïaid jong ki kali ha kaba kane ka la pynïakynduh jingeh ïa ka kynhun ban leit sha katei ka jaka na ka bynta ban leit pyllait im ïa ki briew kiba la ngat ha ka apot.
Ka jingjur slap ka la jia ruh ha Mandi kaba don ha Himachal Pradesh ruh, ka jaka kaba jngai kumba 125 km na Shimla. Ka hukum ba la pynmih da u Deputy Commissioner jong ka Mandi u Apoorv Devgan ka la ong ba ka jingther jong u slap ha ka shnong Rajban kaba don hajan Muhal Terang ka la wanrah ïa ki jingshahkhang lynti jong ki surok bad ki jingtwa khyndew. Ka jingther jong u slap ka la ktah ruh ïa ka jingim kaba man ka sngi ha ka jylla Uttarakhand kaba marjan. Arngut ki briew ki la khlad noh bad uwei pat u la mynsaw hadien ka jingjur slap ha Jakhanyali kaba don ha Tehri Garhwal distrik. Ïa kine kiba la ïap la tip kyrteng kum u Bhanu Prasad (50) bad ka Anita Devi (45).
U nongaiktien jong ka State Disaster Response Force (SDRF) u la ïathuh ba la ïoh jingtip ruh ba ki la don lai ngut ki briew kiba la jah namar ka jingshlei um ha ka miet jong ka sngi Balang. “Ha ka jingpynlong ïa ka jingleit wad, ka kynhun SDRF ka la lap ïa ar tylli ki metiap bad ka la lap ïa u briew uba la mynsaw ha ka thliew kaba jylliew 200 meter. Ïa une uba la mynsaw la rah na ka bynta ban phah sumar,” la ong u nongaiktien, katkum ka jingïathuh ka tyllong khubor.
Ha Haridwar, pat ki la don arngut ki khynnah ki la ïap bad khyndai ngut kiwei pat ki la mynsaw hadien ba ka tnum jong kawei ka ïing kaba la jot ka la twa hadien ba la jur u slap, la ïathuh uwei na ki heh sorkar.
