Ka Olympics 2024 ka la poi noh sha kaba kut ha Paris, France ha ka Sngi U Blei ha kaba ka United States ka la long ka lahduh da kaba ïoh khur haduh 126 tylli ki takma ba kynthup ïa 40 tylli ki takma ksiar katba ka China ka la wan ba ar da kaba khur 91 tylli ki takma bad ka la ïaryngkat bad ka United States ha ka jingïoh ïa ki takma ksiar. Ka Japan ka la wan ha ka kyrdan kaba lai da kaba ïoh 20 tylli ki takma ksiar bad 45 tylli baroh. Ka India ka la wan haduh ka kyrdan kaba 71 da kaba ïoh tang hynriew tylli ki takma, hynrei ha kane ka sien, ka khlem ïoh wat tang kawei ka takma ksiar ruh.
Na India, ki la don haduh 117 ngut ki nongïalehkai kiba la leit ban ïashim bynta ha katei ka Olympics mynta u snem, hynrei ki la ïoh tang kawei ka takma rupa bad san tylli ki takma rnong. Ka Manu Bhaker ka dei ka banyngkong ban ïoh takma rnong ha ka jingïalehkai ïasiat pistol bad ka dei ruh ka banyngkong na India ban ïoh takma ha ka Olympics ha kane ka jingïalehkai. Nalorkata, ka Manu ka la ïoh biang sa kawei ka takma rnong ha ka jingïalehkai ‘Mixed Team’ bad u Sarabjot Singh ha ka jingïasiat Air Pistol ba 10 metre. Sa u Swapnil Kusale u la ïoh ïa ka takma rnong ha ka jingïasiat pistol. Ka kynhun ïalehkai Hockey jong ka Ri ka la ïoh ïa ka takma rnong bad u Neeraj Chopra u la ïoh ïa ka takma rupa. Hadien kine, sa u Aman Sehrawat u la ïoh ïa ka takma rnong ha ka jingïalehkai ‘wrestling’. Ka India ka la dei ban ïoh sa lai tylli ki tamka namar u Lakshya Sen, ka Mirabai Chanu bad ka Manu Bhaker, kaba la dei ban ïoh lai tylli ki takma tang marwei, ki la wan noh ha ka kyrdan kaba saw.
Ki jingïalehkai ba ka India ka la ïashim bynta ki long 16 tylli ba kynthup ïa ka Archery, Athletics, Badminton, Boxing, Equestrian, Golf, Hockey, Judo, Rowing, Sailing, Shooting, Swimming, Table Tennis bad Tennis. Katkum ki jingkheiñ jingdiah ba la ai da ka Sports Authority of India’s (SAI) Mission Olympic Cell (MOC), ka Sorkar India ka la pynlut kumba T. 470 klur ban pynkhreh ïa ki nongïalehkai ha kine ki 16 tylli ki jingïalehkai. Ha ka Tokyo Olympics saw snem mynshwa, ka India ka la jop hynñiew tylli ki takma ba kynthup ïa kawei ka takma ksiar. Naduh ba sdang ka Olympics ha u snem 1900 ha Paris bad haduh mynta, ka jingïoh khur takma jong ka India ka long tang 41 tylli ki takma. Lada ngi peit pat ïa ka United States bad China, tang na kane ka Olympics ba mynta ruh ki la ïoh haduh 126 bad 91 tylli ki takma. Ym don lad satia shuh ban ïanujor hapdeng ka India bad kine ki artylli ki Ri ha ki kam ïalehkai Olympics.
Watla ngim pat don ka jingtip kaba shai, hynrei ngi sngewthuh ba ka India ka dang pynlut duna palat ha ki kam ïalehkai – tang T. 470 klur kat ha ka Olympics. Ban ïakhun kat ha ka lympung Olympics, ngi donkam da ki ‘thei bad ki ‘rang kiba da kynsai shisha bad kiba la ïoh jinghikai naduh ba ki dang rit. Kumba ka long mynta, ki nongïalehkai na India kiba kham paw ki dei na ka jylla Haryana, Manipur, Punjab watla ki don ruh sa kiwei kiba wan kham hadien. Namarkata, ka Sorkar India ka dei ban pynleit jingmut ban sei ïa ki nongïalehkai naduh ka rta ba ki dang rit bad ban hikai ïa ki miet la bad sngi ba kin long ki bakynsai.
Kawei ka jingduna ha India ka long ka jingpynleit jingmut palat ha ka jingïalehkai kriket haduh ba ki nongïalehkai kriket ki shah kheiñ kum ki ‘lei khyndew. Hynrei haduh mynta, ïa kane ka jingïalehkai ym pat shym la kynthup satia ha ka Olympics. Na ka por sha ka por la ju kdew ba ka long kaba bakla ban pynleit jingmut bad theh pisa tang ha ka kriket namar kan pynrandien noh ïa ki nongïalehkai kiba don ka sap ha kiwei pat ki jingïalehkai. Ngi ïohi ba ki nongïalehkai kriket ki kamai da ki phew klur tyngka katba kiwei pat, bun kim ïoh eiei. Kane ka pynïap syndon ïa ka mynsiem bashlur jong kiwei pat ki nongïalehkai.
