Shillong, Nailar 11
Ka East Khasi Hills Boxing Team ka la rah ïa ka nam lahduh ha ka lympung ïakura kaba la tip kum ka State Sub Junior and Junior Boys & Girls Boxing Championship ba la pynlong ha Indoor Sports Hall, Mawlai Mawroh, Shillong naduh ka 7 haduh 9 tarik mynta u bnai.
Ïa kane ka lympung la pynlong da ka Meghalaya Boxing Associa-tion ha ryngkat ka jingïatreilang bad ka Directorate of Sport & Youth Affairs, ka Sorkar Jylla. Ha kane ka jingïakop la wan ïashim bynta palat 100 ngut ki nongïakura (76 ngut ki shynrang bad 29 ngut ki kynthei) na phra tylli ki District bad ruh kito kiba khlem ïohlad ban mihkhmat ïa ka kynhun district, kata 5 ngut na Khasi, Jaiñtia bad RiBhoi bad 3 ngut na rilum Garo.
Ka East Khasi Hills Boxing Team ka la long ka lahduh ne ka ‘Overall Team Champion’ bad ka West Garo Hills Boxing Team pat ka la wan ha ka kyrdan kaba ar. U Leofernando Nongkhlaw (na ka Mawsbuit Boxing Club) u la khur ka nam Best Boxer ha ka Sub Junior Boys Division bad ka Elizabeth Z Ngamlai na ka West Jaintia Boxing Association ka la khur ka nam Best Boxer na ka Sub Junior Girls.
Ha ka kyrdan Junior Division pat u Ricky Rynjah na ka East Khasi Hills Boxing Association u la khur ka nam Best Boxer bad ka Melbarine Swer na ka Green Heart Boxing Club ka la khur ka nam Best Boxer ha ka Girls Section.
Ka MBA ka don ka jingkyrmen ba lyngba ka jingpynlong ïa kum kine ki lympung, kan lah ban sei ïa ki ‘rang bad ‘thei donsap bad ban ai jingpyntbit kaba biang khnang ba kin lah ban paw ha ki Regional bad National Boxing Championships.
