Shillong, Nailar 11
Ka Nongstoiñ District Sports Association (NDSA) ka la nang lah ban kyntiew shajrong ïalade ha ka jingtam point ha ka U-16 na ka Group-D ha ka lympung Meghalaya Youth League 2024, kata ban tam da 5 point ïa kiwei pat ki district association kiba don lang ha kajuh ka group.
Haba phai pat sha ka kyrdan U-14, ka Nongstoiñ District Sports Association ka la hiar da shi point na ka Pyndengumiong District Sports Association kaba don hakhlieh duh ka miej ïakheiñ point.
Hadien ba la dep saw tylli ki round, ka kynhun ïalehkai U-16 jong ka NDSA ka la khur 10 point kata hadien ba la pynliem noh ïa ka Mawshynrut Sports Association da 4-3 kol. Katba kiwei pat ki lai tylli ki district association ki dang ïoh tang mar 5 point, kata ka Mawshynrut (kaba la mad ruh ka jingshah rem kaba nyngkong), ka Pyndengumiong (kaba la pynliem noh ïa ka Mawkyrwat District Sports Association da 4-1 kol) bad ka Tyrsad Area Sports Association (kaba la ïakhaid ha ka jingïalehkai pyrshah ïa ka Eastern Border Sports Association, khlem da don ba ïoh pynkhih jar).
Ha ka kyrdan U-14, ka dei ka Pyndengumiong kaba khlieh ïa ka miej ïakheiñ point da 10 point hadien ka jingïakhaid noh ha ka jingïakhun pyrshah ïa ka Mawkyrwat ha kaba ym shym la don kiba ïoh thep kol. Katba ka Nongstoiñ pat ka la pynliem noh ïa ka Mawshynrut da 6-1 kol, bad ka Eastern Border ruh ka la jop ïa ka Tyrsad da 4-0 kol.
Haba phai sha kiwei pat ki district, ka West Jaiñtia District Sports Association ka la khur biang ka jingjop ha baroh ar tylli ki kyrdan ha ka Group B, kata da kaba jop da 2-0 kol bad 4-0 kol pyrshah ïa ka Amlarem Block Sports Association ha ka U-14 bad U-16.
Ha kiwei pat ki jingïalehkai jong ka Group B, ka Laskein Block Sports Association ka la khur jingjop ha ka U-14 da 2-1 kol pyrshah ïa ka East Jaintia District Football Association, katba ha ka U-16 pat ka East Jaiñtia ka la pynliem noh ïa ka Laskein da 2-0 kol.
Haba phai pat sha ka jingïalehkai jong ka Group C, ka Shillong Sports Association ka la khur jingjop kaba nyngkong da kaba pynliem ïa ka Western Ri-Bhoi Sports Association da 1-0 kol ha ka kyrdan U-16.
Ha kaba khatduh pat ha ka Group A, ka Tura District Football Association ka la khur ka jingjop da kaba pynliem noh ïa ka North Garo Hills District Sports Association da 4-0 kol, ha kaba u Wanchiang K Marak u la khyrwit marwei ïa baroh saw tylli ki kol.
