Shillong, Nailar 12
Ka Umrynjah SC ka la long ka kynhun kaba nyngkong eh ban jam sha ka final ha ka lympung ïalehkai Under-20 Fourth Division Football League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Umiew Maw U Sam da 1-0 kol ha ka Lah Sngi U Blei.
Ha kane ka jingïakhun semi final kaba nyngkong baroh ar kynhun ki la ïakhun tyngeh naduh kaba sdang, hynrei kim shym la lah ban thep kol. Hynrei shwa ban wai ka Umrynjah ka la lah ban pynurlong na ka bynta ban pynkhih jar lyngba u Wanboklang L. Nongbri ha ka minit kaba 70+2 bad kane ka la biang pura ban khur syndon ïa ka jingjop.
