Jowai, Nailar 13
Ka Lumpyrtuh Mihmyntdu, Phramer, Saiñdur Mihmyntdu bad Riatsaliya Mihmyntdu ki la jop ha ka lympung ïalehkai 3rd Division Football Tournament-4th Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Ha ka jingïalehkai kaba la long ha ka Sngi Ba-ar ha madan Kiang Nangbah Staidum, Jowai, ka Lumpyrtuh Mihmyntdu ka la pynliem noh ïa ka Pateinki Sabah lyngba ka shi kol ba la thep da u Arwan Rymbai ha ka minit kaba 49.
Ha ka jingïalehkai kaba bud, ka Phramer ka la jop da 1-0 kol ïa ka Mooknor Nangbah lyngba ka kol u Riki Suchiang ha ka minit kaba 68.
Ha kawei pat ka jingïalehkai, ka Saiñdur Mihmyntdu ka la pynliem noh ïa ka Nangbah Khloopano da 2-1 kol. Ka Nangbah Khloopano ka la pynkhih jar nyngkong eh lyngba u Star Lamare ha ka minit kaba 37, hynrei ka la shah pynphai kylla ar kol ha ka Saiñdur lyngba u Kerlang Rymbai uba la thep ha ka minit kaba 47 & 52.
Ha ka jingïalehkai kaba khatduh jong kane ka sngi, ka Riatsaliya Mihmyntdu ka la pynliem ïa ka Dongnein Sohmynting da 2-0 kol. Ïa kine la thep da u Ïoh-I Chyrmang ha ka minit kaba 3 bad u P. Kharsohtun ha ka minit kaba 63.
