Shillong, Nailar 13
Shi sngi shwa ban mih na la shnong ban leit sha Punjab, u Myntri ka tnat ïalehkai jong ka Sorkar Jylla u Bah Shakliar Warjri u la pynkup burom ïa uwei na ki khynnah apkol ba dang 7 snem ka rta u Samborlang Rynjah ha ka Sngi Ba-ar hapoh ka kamra treikam jong u.
Kane ka la wan hadien ba une u heprit ba la ju tip kum u ‘Junior Martinez’ na ka shnong Mawryngkneng, u la pyndep dangshen ïa ka jingsoi ïa ka soskular kaba 10 snem kynthih bad ka shlem ai jinghikai jong ka Minerva Football Academy.
Haba pynpaw ha ki lad pathai khubor hadien ka jingai khublei kitbok kitrwiang ïa utei u heprit, u Bah Shakliar u la ong ba ka rynsan Social Media ka ïarap bha lada nang ban pyndonkam ïa ka.
Kum ban shu kdew ba u heprit Samborlang u la pawnam ha ki bnai kiba la dep na ka dur-khih kaba pyni ïa ka jingtbit ap kol jong u bad la pynïasyriem ïa u kum u Emiliano Marti-nez rangapkol ka ri Argentina kaba la rah ïa nam lahduh ha ka World Cup 2022 ha Qatar.
Kane ka dur-khih ka la khring ïa ki klob na shabar Jylla bad bar ri kumjuh. Mynta ka kynti u heprit Samborlang u la ïoh ban soi ïa ka kontrak 10 snem bad Minerva Football Academy ha kaba un shah hikai nadong shadong.
“Ngi la don ka jingïakynduh bad ki bahaïing bahasem, ki kur, ki hynmen u heprit Samborlang bad ngi sa tip ba kumno u poi sha ka bynta ban ïoh iasoi bad ka klob ba pawnam ha ka Ri India”, la ong u Bah Shakliar uba la bynrap ba dei u hynmen jong u heprit Samborlang uba la pynlut por ban ring bad thep ïa ki video ap kol jong u para ha ki rynsan Social Media.
Te kumta u la kyntu pat ba kiei kiei kiba ïa dei bad ka rynsan Social Media ki dei ban long na ka bynta ka jingbha bad jingmyntoi. “Ka tnad ïalehkai ka don ïa ka bynta ban kyrshan ïa ki heprit bad ki khynnah donsap”, la bynrap u Myntri.
Shuh shuh u la ong ba ka jingïaid lynti u heprit Samborlang kan long pat ka jingai mynsiem ïa kiwei pat ba kin trei minot ban ïoh kheit ïa u soh bad u long mynta ka jingsngew sarong ïa ka Ri Khasi Jaiñtia bad ka Jylla hi baroh kawei.
