Shillong, Nailar 13
Da ka jingthmu ban ithuh ïa ki sap ïalehkai kyrpang ne ka Talent Identification, ki la don haduh 10 hajar ngut ki khynnah ha ki 6 snem ki ban wan bad haduh 200 ngut ki ban rung hapoh ka Elite Pathway Program. Na liang ka Meghalaya State Olympic Association (MSOA) ha ka Lah Sngi U Blei ka la pyndep ïa ka jingsoh ïa ka Memorandum of Understanding (MoU) bad ka Sportality.
Kane ka MoU ka long na ka bynta ka TID kaba lai bad kaba ar jong ka EPP2 ha kaba la ïasoi ïa katei ka soskular da u Bah Finely L Pariat, General Secretary ka MSOA bad u Ian Campbell, Director ka Sportality ha kaba la don lang u Bah Dipshon Ryntathiang, Bah P. Laloo bad u Bah John F. Kharshïing, Working President ka MSOA.
Ïa kane ka prokram ba la kdew haneng la plie kham ha shwa da u Myntri Rangbah ka Jylla u Conrad K. Sangma ha ka 14 tarik u Lber 2024 shwa ka ilekshon Lok Sabha. Ïa kane ka Talent Identification Program yn pyntreikam ha kylleng ki district jong ka Jylla.
