Imphal, Nailar:
Ha ka jingïaibteng jong ka kynhun shipai ïada ri ban pynlong ïa ka jingleit khynra sha kylleng ki jaka kiba don ha ki distrik ha ki jaka lum bad ki jaka them jong ka Manipur, la ïoh ban kurup ïa kiba bun ki tiar siat bad tiar pynbthei.
Ka jingleit khynra ka la long sha ki jaka kiba kham ap jingma ban mih ki jingïakynad bad ki jingïapynibor markylliang, ha kaba kane ka la pynlong ban ïoh kurup ïa kiba bun ki tiar siat bad ki tiar pynbthei bad kiwei pat ki tiar pyndonkam kiba kham buh jingma.
Ïa ka jingleit khynra kaba nyngkong la pynlong ha ka thaiñ Saikul Ridge jong ka Churachandpur distrik, ha kaba hangne la ïoh ban kurup ïa ka pistol 9mm, ar tylli ki Mortar Launchers (Pompis), kawei ka suloi shi ktang, ka suloi 12-bore bajrong, ar tylli ki bom kwang kti HE-36, 37 song ki kuli bym pat pyndonkam, ar tylli Detonator Fuse.
Ha kawei pat ka jingleit khynra kaba la long ha ka thaiñ Champhai Hill jong ka Imphal East District, ki shipai ki la ïoh ban kurup ïa lai tylli ki Improvised Explosive Launchers (Pompis), ha ryngkat ki kuli bad ki jingphong ba ïada na ka jingksam ki kuli.
Ïa mynta ki heh ba dei khmih ki dang pynjur ïa ka jingtohkit ban lap dien shuh shuh ïohba dang don kiwei pat ki kynhun kiba don jingthmu ban pynduh ïa ka shong-suk-shongsaiñ ha ka thaiñ.
