Baroh ki jaitbynriew bapher bapher ki long kiba u Blei u la thaw kyrpang. Ha ngi ki Khasi tang teng ki mih ki jingthoh kiba pynpaw lyngba ki nongthoh khana puriskam ba ka jaitbynriew Khasi ka long ka jaitbynriew kyrpang kaba u Blei u la pynlong bad u la thaw. Hooid u Blei u la thaw kyrpang ym tang ïa ngi ki Khasi kum ka jaitbynriew kaba kyrpang.
Katba ha ka ktien u Blei ne ka Baibl u Blei u la thaw kyrpang ïa ka jaitbynriew Jiw ne Israel ha sla pyrthei. Kum ki briew ngi ïa kam beit ba u Blei u la thaw kyrpang tang ïa ka jaitbynriew jongngi ym ïa kiwei. Kiwei ki jaitbynriew ruh ki kam ba u Blei u la thaw kyrpang ïa ki na ki jaitbynriew ka pyrthei. Ka Baibl ka ong, lada phi ktah ïa ka jaitbynriew Israel ka long ba phi ktah ïa ka pylliew khmat iong jong u Blei. Ban shim na kane ka jingong ha ka Baibl dei tang ka jaitbynriew Israel kaba u Blei u la thaw kyrpang na ki jaitbynriew baroh ha sla pyrthei.
Hato phin ngeit ïa kaba kum kane ka jing-ong ba dei tang kawei ka jaitbynriew kaba u Blei u la thaw kyrpang. Hato ïa kiwei ki jaitbynriew ha satlak ka pyrthei mano ba la thaw ïa ki ? Ym dei ba thaw u Blei.
Haba u Blei u la thaw ïa ngi ki briew u la ong, To ngin ïa thaw ïa u briew ha ka dur jongngi katba kum ka jingsyriem jongngi hi. Kumta ïa u briew la thaw ha ka dur jong u hi ha ka dur jong u Blei kein, u la thaw ïa u shynrang bad kynthei u la thaw ïa ki (Jenesis) U Blei u khlem u khlem batai shai ïa kane ka jaitbynriew kaba lieh snieh doh lane kaba iong snieh doh bad kiwei kiwei.
U Blei u la thaw beit ïa u briew. Te lada ngi ong ba u Blei u la thaw kyrpang tang ïa ngi ki Khasi ka long ba ngi knieh noh ïa ka bor jong u Blei. Kum kane ka jait jinghikai ka long kaba ma bad kaba ïalam sha jingsngew pher jaitbynriew. Kumta ngi dei ban phai ha u kum ka jaitbynriew khlem da pynrem ïa kiwei ki jaitbynriew kiba u Blei u la buh bad thaw bynriew hangne ha sla pyrthei. Ka shong ha u Blei ban rai ïa kane ka jaitbynriew u la thaw kyrpang ha kane ka sla pyrthei.
C. B. Iawphniaw
