Hato ka pop ne ka jingiap ka khanglad ïa u briew ban im ? Katba dang im ïa ka bam ka dih ngi lah ban jied ïa kaei kaei kaba dei ban bam bad kaei ka bym bit ban bam. ïa ka niam ruh ngi lah ban jied katba ngi mon ïa kano kano ka niam ba ngi sngew ïahap ha ka jingim jongnga jongphi. ïa ka skul ruh ngi lah ban leit pule kat shaba ngi sngewtynnad. ïa ka jaka puta ban shna ïing shna sem ngi lah ban thied hangno hangno ba ngi i mon ban leit shong leit sah.
ïa ka briew ruh ngi lah ban jied ïa kano kano kaba ngi ibha bad iapmat bad kaba bit tam eh. ïa ka kam ban trei ruh ngi lah ban jied ha kano ka jait kam ngi kwah ban trei. ïa ka riam ka beit ruh ngi lah ban jied katba ngi i mon ha lade. Baroh kine kiei kiei ngi lah ban jied bad ka shong na ka mon jongphi jongnga ban leh. Hynrei ïa ka jingiap ngim lah ban kyntait ne lait na ka, ngi mon ne ngim mon ruh ngi dei ban pdiang beit ïa ka, ha ka akher ka sngi ba ka jingim jongngi ka la kut noh.
Ngim don kynti ban pyllait ne kiar na ka jing-iap. La ngi long Patsha, ne nongkhrong ruh ngin iap kumjuh haba ka por ka la dei ïa phi ïanga ban leit shata. Bad ym don mano mano ba lah ban siew ne thied ïa ka jingiap namar ka dor jong ka ka long kham palat ïa ka spah bad ka ksiar. Bad ym don bor briew kiba lah ban pyllait na ka jingiap. Namar ngim tip ïa kaei ka ban jia ha ka lawei sha lyndet ka jingim jongngi. Ka jingiap ka long kum u lyoh uba mih paw tang shibit ynda kumta te u da jah noh jar (Jakob 4 : 14). Kumta ka jingiap ka long shabar u pud ka jinghikai u briew. Wat shu ngeit biej ïa ki jinghikai ba phin lait na ka jingiap namar ym don ba lah ban lait na ka, wat lada ngi deng ksiar baroh shi rynïeng ruh. Ka jingiap kam ju map ïano ïano. Ka rat naphang khlem jingisynei ïa u khynnah ne u rangbah u tymmen ruh ngin hap ban mad lut ïa kane ka sni kaba ym don ba lah ban lait la phi long syiem ne patsha ruh. Kane ka long ka sngi jong ka jingiap ha ngi ki briew.
C. B. Iawphniaw
