Bashanbor Lyngdoh Mawnai
Bun ki paradoh parasnam ka jaidbynriew jongngi ki ong “Yn donkam aiu ban ïada ne ban ieid ïa kata ka Ri bad Jaidbynriew, peit shwa ïaka kam ka jam bad ka kamai ka kajih lajong” don pat kiba ong “Lada ai tulop kita ki sengbhalang te, ngin ïa rung seng namar bym ioh kam sorkar, hynrei haba ym ioh eiei te ngin leit pynlut por leh aiu shata” Kata ka dei ka jinghikai kaba lah hikai da ki kmie ki kpa ïala ki khun ha kane ka juk kaba mynta. U ba bun balang u kren ïa kaba u sngewdei eh ha la ka jingshem lade, uba bun lei lei u hikai khun na ka ktien ka thylliej kaba shu tam na surok lane na ïew na hat hynrei um shym la ngam jylliew pat sha kita ki tynrai kiba donkam eh ban sngewthuh shwa ïalade ïa ki jingshisha ha shwa ban hikai ne kren ïala ki khun.
Kumno ban long u nongshong shnong uba bha bad kumno ban hikai ïala ki khun
Ban ong ba ieid ri, baroh ngi ïa ieid lut, kam myntoi ban ong ba phi ieid ri katba ki kam jongphi pat kim paw satia kumba phi ong. Kynmaw baroh ngi ieid ïala ka Ri namar ka dei ka kamram ba ngi dei ki nongshong shnong jong kata ka Ri, ngi bud ryntih ïa kata ka constitution kum kita ki nongshong shnong ba bha bad ba don ka jingkitkhlieh. Tangba kumno pat ngin hikai ïa kine ki khun jongngi ba kin ieid ïala ka jong ka ri kum kita ki nongshong shnong kiba bha bad kiba don ka jingkitkhlieh.
Ban long u nongshong shnong uba bha bad kitkhlieh ka donkam ïaka sainpyrkhat kaba janai bad bunsien ka eh palat ban batai. Lada ngin kylli na ki riew paidbah, ngin ioh bun bah ki jubab. Lehse kin wan kumne “donkam ban long u ne ka briew kiba bha haka imlang ka sahlang” bad kin bud sa ki jubab ki ban ïadei bad ki kamram ki nongshong shnong (civic duties).
Uwei u Rangbah shnong nangne na Mawlai u ong ïanga kumne “Ban long uta u nongshong shnong uba bha bad uba don ka jingkitkhlieh bad uba long ka nuksa babha ïa kiwei, ka donkam ïaka jinglong ba sbun, ka jingïaieid bad ka jingkitkhlieh shwa ïa kiwei. Teng teng ka donkam ruh ïangi bangin sngewthuh khamtam eh ïa kito ki briew kiba ïapher ka jingngeit bad ka rukom pyrkhat ka jong ki. Kane ka jingsngewthuh ka jongngi ka pynlong ïa kiwei ba kin sngewtynnad ïangi bad kumjuh ngi ruh ngi ioh ban pule shibun shaphang jong ki.”
Ha ka jylla jongngi ka kham eh bha ha kane ka por mynta. Ka jingtlot ka kamai kajih (economy), ka jingpynjot ïaka mei mariang, ki ishu bapher bapher na ka jingtlot ka synshar khadar kiba la pynlong ïaka jingkhih phaloh kat shaba phai, ym i don shuh ka jingsuk ha kane ka juk. Hynrei ngi dei pat ban tip ba kane ka dei ka lad ka kabu ban sdang ban hikai ïa ki khun ki jongngi kumno ban long ki nongshong shnong kiba bha, badon burom bad ba don ka jingkitkhlieh.
Ha shwa ba ngin ioh ban ïarap ban pyn sngewthuh ïa ki khun ki jongngi iaka kamram haka imlang ka sahlang, ngi donkam ban pynsngewthuh shwa ia ki. Ka mut kumno haba ngi ong ba phi dei ban long u nongshong shnong uba bha bad uba don ka jingkitkhlieh?
Nyngkong eh, ki don ki aiñ kiba la don lypa (constitution) bad kiba ngi dei ban bud. Ngi dei ban bud ryntih ïaka aiñ, ngi dei ruh ban vote. Nangta pat
Ngi dei ban burom ia kiwei bad iaka jingdon jingem jong ki,
Ngi dei ban tip iaka hok lade bad ïaka hok jong kiwei,
Ngi dei ban tip ïa ki jingjia ne ki ishu kiba jia ha sawdong ka Ri jongngi,
Ngi dei ruh ban tip bad burom ruh ïala ka history jong ki longshwa manshwa, ka kolshor u mynbarim bad ka tynrai kaba ngi ngi mih,
Ngi dei ban don ka jingsngewthuh ïa kiwei ha ka imlang ka sahlang jong ngi,
Ngi dei ruh ban shim ka jingkitkhlieh ïala ka jingleh lajong bad ym ban kynnoh ïa kiwei lada ngi bakla,
Ban long ruh kita kiba burom ia ka jingngeit niam kiwei bad ka rukom im jong ki,
Ban sngewthuh bad ban bishar hok ïaka jingshisha da kaba kren ne ïeng ha ka nongrim ka jingshisha wat lada ki bor ba halor ki pynkheiñ iaka.
Haba phi lah sngewthuh ban long uta u nongshong shnong uba bha bad uba kitkhlieh, ka lah dei ka por jong phi ban ïathuh ïa ki khun jong phi ïa kitei ki jingshisha hajrong. ïakren bad ki, sngap ïa ki, aiu kin ong pat ïaphi bad kane kan long u symbai jong kata ka saiñpyrkhat kaba bha ïa uba phi phi bet ha ki. Batai ïa kaei kaba phi phi kyrmen ban leh haka jingim jongphi bad nangta phi donkam ban pynshlur ruh ïa ki ba kin kylli jingkylli bad phin jubab katba lah da ki jubab kiba khuid bad kiba hok katkum ka jingshisha.
Long uta ne kata ka role model :
Phi dei ka nuksa kaba bha eh ïala ki khun kiba dang don haka jingsumar sukher ka jongphi. Tip ba phi hap ban pynwandur maphi hi ïa ki jinglong kiba phi kwah ban iohi ha ki khun ki jongphi.
ïatai ïa ki issues (ishu) :
Wat nym tieng ban ïakren bad la ki khun ïa ki ishu. Ki dei ban tip ïaki jingshisha daka phi batai ïa ki jingïathaw ne ïapait ka synshar khadar, ki jingjia ba man la ka sngi, ki ishu haka imlang ka sahlang, ka shnong ka thaw, ka Ri, ka Jaidbynriew, ki ri haka pyrthei ki jingïakynad bad ki jingkiew jinghiar ka ioh ka kot. Ka jingisih jaidbynriew (racism) bad ter ter. Dei da kane ka jingiakren ïatai bad ki, kan pynshai kdar bad pynsngewthuh ïa ki.
Ban long u nong vote uba don jingkitkhlieh :
Wad bniah shwa na lade, ïakren shaphang ki kandidate bad ki jingiohi jong ki bad balei ba ngi vote ïa u A ym ïa u B. Ialam ia ki khun ha ka por ilekshon ba kin iohi ba phi leit ban thep ïaka vote ka jongphi. Kane kan ktik bha ïaka jingmut jingpyrkhat jong ki. Kumjuh kane kan pynskhem ïa kata ka jingngeit ha lade. Lyngba ka pyni jongphi ïa ki mat kiba long kiba donkam eh ïa phi bad ka ïing ka sem hi baroh kawei. Ki khynnah kim dei ban shu kut tang ha ka ban pule iaki kot skul hynrei ki dei ban tip ïa ka pyllun sawkun kaba don shabar bad kaba ker tawiar ïaka rympei ïing jong ki.
ïa leh ban ïashimbynta ïalade ha shnong ha thaw :
Mih shakhmat ban kyrshan ïa ki kam shnong kam thaw, volunteer lang ha ki kam ki Seng Samla ne ki Seng Kynthei ha shnong. Kyrshan ïa ki jingiakhun jong ki nongïalam jong ki sengbhalang kiba ju trei mon sngewbha na ka bynta ka bha ka miat u duk u rangli bad ki jingeh ka jaidbynriew. Lane ïashim bynta haki kam ka Balang kiba ju lum ju lang ïala ki para bangeit ban ïaleh kaei kaei kaba pynsngewtynnad lada ka dei ka jingshakri blei ne ha ki prokram jingïalehkai ki khynnah bad ki samla, ki longkmie bad ki rangbah ruh kumjuh. Lada ioh lad ïalam ïa ki khun ban pyn ïashimbynta lang kan iarap ban pynbha ïa ka jingim ka lawei jong ki bad kan rung ïa kata ka mynsiem ban ïashimbynta bad khamtam ba ngin thep ha ki ïaka mynsiem ka jingïatreilang.
Ngi hap ban kynmaw ïaka rukom ïakren kaba khlem ka jingïamai ïatim :
Ka jingïakren ïatai ka long u shabi bad ki don ki por ruh ba ka jingïakren ka long ba lad thawdur kaba myntoi shikatdei eh. Mynta nga iohi ba bun ki jingïakren ki poi sha ka jingbym ïasngewthuh jingmut da ki jingïañia jingïamai bad ha kaba khatduh ym don ba jop re mano mano ruh. Ka rukom ïakren daka burom bad ka jingsngap daka jingpuson nga iohi ka lah nang duh kat nang mih ki sngi. Bun ki briew ki la leh ban kiar na ka jingïakren bad kane ka pyndkut noh ïaka jingïadei bad ngi lap ba bunsien ka jingïasuk ka shu jah noh sha ki rngai bah jong ki pateng.
Takadaw balei ka long kaba donkam eh ban thep haka jingmut ki khun ki khynnah ïaka jingkordor ka jingïakren. Ngi dei ban pynkynmaw ïaki khun (wat iaki ba lah heh ruh kumjuh) ba ka long kaba dei eh ban pynpaw ïaka jingsngew pyrshah ïa kano kano ka bynta lyng-ba ka jingïakren, hynrei ym ban shu sngap laka sngap noh kumto. Ka la dei ka por ïangi ba ngin sngewthuh ba kiwei ruh ki don hok ban pher ha ka rukom pyrkhat bad pher ki jingiohi ki jong ki. Namar kam dei shuh mynta ban ngin ïai im sah ha ka ban pynksan hok ïalade bad ban pynrem ïa kiwei.
Shibynta ban long u nongshong shnong uba bha bad uba don ka jingkitkhlieh ka dei ba phin tip ba ym baroh kin pdiang iaphi hynrei ban burom ruh ïaka jingiohi kiwei wat lada ngi tip ba ka pher bak ly bak na ka jing-iohi jongphi. Kaba kongsan ka long ba hato kita ki jingiohi jongphi la pynskhem da ki jingshisha ne kumno. Namar tang ka jingshisha hi kaba donkam tam ban pynskhem ïa kano kano ka jingïakren ne jingïatai.
Ban long u nongshong shnong uba bha bad ba don jingkitkhlieh haka pyrthei digital mynta :
Ka dei kaba dei eh ban long u nongshong shnong uba bha bad ba don jingkitkhlieh haka pyrthei mynta. Hynrei kane ka pyrthei stad mynta ka la kynthup lang sa ïa kata ka pyrthei digital. Ka Social media ka don ïaka bor bah haka imlang ka sahlang, ka ïarap ban ai jingtip, ban pynsngew ïaki jingpyrkhat jongngi, ban pyni ïaki kam ba ngi trei ne leh bha ïakiwei. Phi dei ban tip pat ba kane ka rynsan kam shym la long kaba bha ban shaniah iala ki khun ha kane ka pyrthei digital. Ka lah ban ïalam bakla pynban ïaki bad kan ktah ruh ïaka jinglong jingim bad ka pyrkhat pyrdain jong ki ha baroh ki liang.
Ban hikai ïaki khun jongngi ban long ki nongshong shnong kiba bha bad ba don jingkitkhlieh ha ka pyrthei digital ka long kaba donkam eh. Bad ngi hap ban hikai bha ba kin sngewthuh ban ïakren bad ban tip ïaka jing donkam ïa ka burom bad ka jingshisha hakane ka jylli digital (digital sphere). Kumjuh ruh kan ïarap shibun ïa ki khun jongngi.
Kane ka por kum ka seng ngi ïakhun meit la bad sngi pyrshah ïa u drok bad ngi lap ka daw tynrai ba ki khynnah ki samla ki ngop ha une u jingdih basniew ka long ka jingtlot palat ki kmie ki kpa ban hikai ban lam lynti iaki khun. Kam don ka kam ka jam ne ka kamai ka kajih kaba kham khraw ban ïaka kam ban ri sumar kyndong ïala ki khun. Bun ki kmie ki kpa ki ai daw ba lah bunkam palat, lah hap ban ïehnoh iaki khun ba kin im ha la ka jong ka mon. Don ruh kiba sahnud ban shu ïeh kumto ki ai noh daka pisa namar kan ïarap lada ki donkam bad kwah eiei ki khun. Tip ba kane kam ïarap, kan pynjot pynban. U drok une u ap ha khmat ka phalor jongngi bad lada ngi bakla phai tiak, ki khun ba lui lui jongngi kin ngat khlem pep.
Hynrei da kaba hikai ïala ki khun ha kata ka lynti kaba dei, da kaba ngi pyni ïa ki jingshisha kiba ki dei ban tip, to tip ba ngi la pynheh pynsan ïaka pateng bathymmai jong ki nongshong shnong kiba don ïa ka jing-kitkhlieh ym tang ïalade hynrei ïaka ïing ka sem kumjuh ïaka shnong ka thaw, ka imlang ka sahlang bad ïaka Ri bad ka jaidbynriew baieid jongngi kaba long kaba rit eh hapdeng ki jaidbynriew kane ka pyrthei bah.
Khublei shibun
