Shillong, Nailar 25
Ka Shillong Lajong Football Club ka long kaba la pynkhreh ban ïakhun pyrshah ïa ka North East United Football Club ha ka semi-final ka lympung Durand Cup 2024 ka ban long ha JN Stadium, Polo ha ka sngi Nyngkong ha ka por 5:30 janmiet.
Lah ban pynkynmaw ba ka ticket na ka bynta kane ka jingïalehkai, la dep ban die lut plain, hynrei na ka bynta kito kiba khlem ïoh tiket la pynkhreh ban buh da ki ‘giant screen’ ha kylleng ki bynta jong ka nongbah Shillong bad ruh ha kiwei ki bynta jong ka jylla.
Lah ban kdew, ba ka Shillong Lajong ka la ïoh rung sha ka semi-final hadien ba ka la pynliem noh ïa ka East Bengal da 2-1 kol ha Polo bad ka North East United pat ka la jop ïa ka Indian Army da 2-0 kol ha Kokrajhar.
Ka Shillong Lajong kaba la pynkut ka lynti ïaid tang ha ka group stage ha u snem ba la lah ha kane ka lympung, hynrei ha kane ka lympung jong u snem 2024 la lah ban sakhi ba ka kylla bad pher na ka bynta ka Lajong kaba la pyndonkam hok ïa ka kabu jong ka jingïoh ïalehkai ha la ïing.
Haba kren sha ki lad pathai khubor ha ka sngi U Blei, shisngi shwa ka jingïalehkai, u Head Coach ka Shillong Lajong u Jose Carlos Rodriguez Hevia u la ong, “Ka jingïakhun semi-final lashai ka sngi kan long shisha kaba heh na ka bynta ka club, ki nongkyrshan ka club bad ïa baroh ha Meghalaya. Ngi long kiba la pynkhreh bha na ka bynta kane ka jingïalehkai bad ngin ïalehkai ha ka bor baroh ka jong ngi pyrshah ïa kane ka club kaba khlaiñ.”
“Ngi don ka jingthrang dik dik na ka bynta kane ka jingïalehkai ban long lashai ka sngi bad ngin bteng ha ka ban ïalehkai ïa ka rukom ïalehkai kaba ngi la pynpaw haduh mynta sha ki nongkyrshan kiba ieit jong ngi. Ka North East United ka dei ka club kaba khlaiñ bad ngi kyrmen ba ngin don ïa ka jingïalehkai kaba itynnad bha pyrshah ïa ki,” la ong u kapten ka Lajong u Hardy Cliff Nongbri.
Ha kawei pat ka liang, ka NEUFC ha kane ka lympung la sakhi ba ka la don ki snar ‘rangïalehkai shakhmat kiba la lah ban khyrwit haduh 10 tylli ki kol tang ha ka group stage. U Jithin MS, Guillermo Fernandez bad Nestor Albiach ki lai ngut ki ‘rang ïalehkai shakhmat kiba lah ban buh jingeh ïa ki ‘rangïalehkai dien ka Shillong Lajong, khamta da ka jingïarap ki ‘rangïalehkai pdeng kata u Mohammed Ali Bemmamer uba na Morocco bad ka bynta ba shadien ruh la sakhi ba ka long kaba skhem bha ha kane ka lympung, ha kaba ka North East United ka dang shah thep tang shi kol ha kane ka lympung haduh mynta.
U Head Coach ka North East United u Juan Pedro Benali u la ong, “Kan long shisha ka jingmad ïa ka jingshem kaba paka na ka bynta jong ngi ban ïakhun ha ka semi-final jong kane ka lympung bad khamtam lei hakhmat jong ki nongkyrshan ki jong ngi bad ki paidbah ki ban pyndap smam ïa ka stadium.”
“Ngim sngew satia ba ngi long nabar hynrei ngi sngew kumba ngi don ha la ïing, watla ngin ïakhun pyrshah ïa ka Shillong Lajong. Kan long shisha ka jingïalehkai kaba itynnad bad nga sngew sarong ba ka jingïakhun kan long hapdeng ar tylli ki Club kiba na kane ka thaiñ shatei lam-mihngi,” la ong u Benali.
U la ong, “Ngi sngew shisha kumba don ha la ïing, namar ngi don ïa u Redeem Tlang uba dei u samla na kane ka jylla, bad ngi kyrmen ba ngin ïoh ka jingkyrshan kaba radbah na ki paidbah.”
Haba kylli hato kan don ka jingeh ban ïakhun hakhmat ki nongkyrshan ba radbah jong kawei pat ka kynhun ïakhun pyrshah, u Benali u la ong, “Ha ka jingshisha, ngi ieid bad sngew tynnad ban ïalehkai hapoh ka stadium kaba dap smam da ki nongpeit kai. Kane ka ïarap ïa ki ‘rangïalehkai ban kyntiew ïa ka mynsiem ïalehkai ka jong ki bad ha ka rukom kaba laitluid ban don ka thong sha ka jingjop beit.”
