Shillong, Nailar 26
Ka jingïaid lynti ka Shillong Lajong FC ha ka lympung ïalehkai 133rd IndianOil Durand Cup ka la poi sha kaba kut hadien ba ka la shah rem noh ha ka NorthEast United FC (NEUFC) da 3-0 kol ha ka lah sngi U Blei ha Jawahar Lal Nehru Stadium, Polo.
Kane ka la wan urlong lyngba ki kol ba la thep da u Thoi Singh, Alaaeddine Ajaraie bad u Parthib Gogoi na ka bynta ban pynlong ïa katei kynhun ïalehkai Indian Super League ban jam sha ka final.
Kane ka jingshah rem noh ka Shilong Lajong ka la long ka jingsngewsih kthang ïa kumba 16000 hajar ki paidbah nongkyrshan kiba la pyndap ïa ka stadium hi baroh kawei bad kumjuh kiba sakhi lyngba ki ‘giant screen’ kiba la pynïeng kylleng ka nongbah bad kumjuh ha ki district bapher bapher jong ka Jylla.
Ha kane ka jingïakhun ki rangïalehkai ka Shillong Lajong ki la pyrshang ban ïakhun tyngeh naduh kaba sdang, hynrei kim shym la lah ban shan na ka daw ka jingïalehkai bha u Mohammed Ali Bemammer ha ka bynta kaba shapdeng ban pynbud bol ïa ki rangïalehkai ka NorthEast United hapoh ka jingïalam u Juan Pedro Ben Ali (coach). Te kumta ka United ka la ïoh ban pynkhih jar nyngkong eh ha ka minit kaba 13 lyngba u Thoi Singh. Kane ka shi kol ka la pynkyndit bynriew ïa ki rangïalehkai ka Shillong na ka bynta ban ïakhun tyngeh, hynrei kim shym la lah ban pynurlong.
Hadien shiteng kynta ka NEUFC ka la ïoh ban thep biang ïa ka kol kaba ar lyngba u Ajaraie ha ka minit kaba 33 hadien ka jingïarap pynbuh da u rangïalehkai ba kynsai uba na Spain u Nestor Roger na ka bynta ban tam 2 kol haduh kaba kut jong ka kylla step.
Watla ka Lajong ka la lah ban pynliem ïa ka East Bengal ha ka semi final, hynrei kam shym la lah ban pynphai wat tang shi kol ruh na ka daw ka jingtbit palat ki rangïalehkai ‘dien ka NEUFC, kiba la lah ban ïalehkai tang shiteng madan hadien ba la bteng ïa ka jingïakhun ha ka kylla miet.
Hashwa ban wai u NEUFC ka la ïoh ban thep biang sa shi kol lyngba u Parthib ha ka minit kaba 90+3 na ka bynta ban khur syndon ïa ka jingjop.
Lyngba kane ka nam jop ka NorthEast United kan pynkhreh ïa ka jingïakhun final ka ban long ha ka 31 tarik mynta u bnai pyrshah ïa kawei na ki kynhun ki ban khur jingjop ha ka sngi Ba-ar hapdeng ka lahduh jong u snem ba la lah ka Mohun Bagan Super Giant bad ka Bengaluru FC, ki ban ïakhun semi final ha Vivekananda Yuba Bharati Krirangan ha ka por 5:30 janmiet.
