Ka jingïaid lynti jong ka Shillong Lajong FC ha ka Durand Cup 2024 ka la poi noh sha kaba kut ha ka 26 tarik Nailar, 2024 hadien ba la shah pynliem ha ka Northeast United FC ha ka jingïakhun ‘Semifinal’ ha Jawaharlal Nehru Stadium, Polo. Ym shym la poi pyrkhat ba ka Durand Cup kan lah ban pynlynguh ïa ka sor Shillong bad kiwei pat ki distrik haba peit na ka jingwan tuid jong ki paid ieid phutbol ban thied ïa ki tiket. Naduh ka sngi ba sdang ïa kane ka jingïalehkai ha Shillong bad haduh ban da poi sha kaba kut (namar ka jingshah rem jong ka Shillong Lajong), ka jingshongshit bad jingshitrhem jong ki paidbah ka la paw. Ki la don bun bah kiba la ïeng laiñ ban thied tiket naduh dang step bad ki la iehnoh wat ban dih ïa ka sha step. Ki la shah ïa u slap, Sngi, lyer ban ap beit khop ïa ki tiket. Don kiba ïoh, bad bun kiba duh. Ka jingsngewsih kthang jong kiba duh tiket ka long kaei-kaei kaba sngewphylla namar ngim ju kham ïohi koit ba da ki hajar ngut kin leit ïa tuid sha JN Stadium ban peit kai phutbol ha man ba don ka jingïakhun jong ka Shillong Lajong ha kane ka Durand Cup.
Da shisha, ki nongpynïaid, nongïalehkai bad nongpeitkai kin sah kynmaw ïa kane ka Durand Cup kaba la wan ha ka sien banyngkong eh ha Shillong. Ngi la peit kai sha kiwei pat ki jaka ba la pynlong lang ïa ki jingïalehkai jong kane kajuh ka lympung, hynrei kim pat lah ban ïa kot bor bad ki paidbah shane. Lada ki ieid ïa ka jingïalehkai phutbol ruh, hynrei kito ki jaka ki khlem pat lah ban sei briew kumba sei ha JN Stadium. Ka long shisha kaba I hun ban peit ba naduh ki khynnah, samla bad ki rangbah ki la ïa leit ban ai mynsiem ïa ki nongïalehkai. Watla ki la shah beiñ shah khoh namar ka jingsmat jingsting ban leit ap tiket naduh dang step, hynrei ki khlem salia namar ka jingieid ïa ka jingïalehkai. Lada ym don sa ki paidbah ban pyndap ïa ki jaka shong ha JN Stadium, ngin ym ïapher shuh na kiwei pat ki jaka kiba la ïoh lad ban pynlong ïa ka Durand Cup mynta ka kynti. Hynrei ha ka jingïaleh, hap don kiba jop bad kiba rem. Ha ka 26 tarik Nailar, ka Shillong Lajong ka la liem ha ka kynhun kaba kham khlaiñ bad tbit ban ïa ka.
Ngi dei ruh ban ai burom ïa ka Shillong Lajong kaba la poi shaduh ka ‘Semifinal’ ha kane ka lympung watla ka khlem don ki nongïalehkai kiba pawnam ym kumba long kiwei pat ki klob khamtam kum ka Emami East Bengal FC bad ka Northeast United. Kine ki dei ki kynhun kiba ïakhun ha ka Indian Super League (ISL) bad namarkata ki kham don ïa ki nongïalehkai ki bakynsai haba ïanujor bad ka Shillong Lajong kaba dei ka klob I-League. Watla katta, ka Shillong Lajong ka la ïakhun shitom. Lehse lada ka Shillong Lajong ka la lah ban sei da ki nongïalehkai kiba kham kynsai, kan jin da la lah ban poi shaduh ka phainal jong kane lympung ka ban long ha ka 31 tarik Nailar ha Kolkata. Lehse ha ki sngi bad ki por ki ban wan, kane ka kynhun kan sa lah ban sei ïa ki nongïalehkai kiba kham kynsai.
Ha ka jingim briew, teng-teng donkam ban leit sha ki lympung ba pynbyrngia. Ngi ïohi ba ki la don bun kiba shah kren beiñ namar ka jingieid ïa ka phutbol kaba la phalang lyngba ka Durand Cup. Lehse kita kiba beiñ ba khoh kim da ieid kum kiwei ïa kane ka jingïalehkai. Ha ka jinglong briew, ngi don la ki jong ki jong ki jingsngewtynnad kaba pher iwei na iwei pat. Hooid, ha ka jingbitar bym ïoh tiket, ki la don kiba la byrngem ban leit tur sha JN Stadium khlem tiket, hynrei donbok ba ki khlem shlan ban leh kumta bad kiei-kiei baroh ki la ïaid beit ïaid ryntih. Lada dei ba mih ki jinghuri hura, khlem pep ngin hap ban shah ïa ki jingkynthoh kiba laiphew jait laiphew skit na kylleng sawdong.
Ngi kyrmen ba ka Durand Cup kan sa wanphai biang sha Shillong ha kine ki aïom ki ban wan, bad ba ki paidbah kin ïaineh ha ka jingieid ïa kane ka jingïalehkai phutbol kaba long kawei na kiba itynnad tam ha ka pyrthei. Kumba ki nongpynïaid ki la ïohi ïa u paid byllien uba la tuid sha JN Stadium, lehse ma ki ruh ki la sngewïoh mynsiem ban pyrkhat ban pynlong biang ïa ka Shillong kum kawei na ki jaka ban pynïalehkai ïa ka Durand Cup. Na ka liang ki kynhun ïalehkai phutbol na Meghalaya, kin hap ban nang pyntbit shuh-shuh ïalade khnang ba kin lah ban ïa aireng bad ki kynhun kiba kham khlaiñ.
