Jowai, Nailar 27
Ka Mookaswan Dongwah bad Mulang Ïalong ki la jam sha ka quarter final jong ka lympung ïalehkai 3rd Division Football Tournament-4th Adelbert Laloo Memorial Trophy ba la pynïaid da ka West Jaiñtia District Sports Association (WJDSA) hadien ba ki la lah ban khur ïa ka jingjop.
Ha ka jingïakhun pre-quarter final kaba la long ha madan Kiang Nangbah Stadium, Jowai, haka sngi Ba-ar, ka Mookaswan Dongwah ka la pynliem noh ïa ka Mookyrdup da 2-1. Ïa ka kol jong ka Mookyrdup la thep da u Dennis Passah tang haka minit kaba 2, katba ka Mookaswan Dongwah ka la pynphai kylla ha ka minit kaba 43 lyngba u Bormi Shylla bad minit kaba 72 da u Khel Shylla.
Haba phai sha kawei pat ka jingïakhun kaba ar, ka Mulang Ïalong ka la pynliem noh ïa ka Da i hi Mynsngat da 7-6 lyngba ka tie-breaker hadien ba ki la ïakhaid mar 2-2 haduh kaba kut ka jingïalehkai.
Ka Mulang Ïalong la thep kol lyngba u Ritre Lyngdoh ha ka minit kaba 11 bad u Richard Dhar ha ka minit kaba 45, katba na ka bynta Da i hi Mynsngat la thep da u Banker Muksor ha ka minit kaba 80+2 bad Deepson Tokbi haka minit kaba 80+4.
