Shillong, Nailar 27
Ka North East Football Development Council (NEFDC) ka dangwad ïa ki lad ki lynti ban kyntiew bad ban pynkhlaiñ ïa ka jingïalehkai phutbol ha ki jylla ka thaiñ shatei lammihngi, kynthup ïa ka inter-club league kaba dangdon ha ka jingpyrkhat bad ka Dr T Ao Football Tournament kaba la pynthymmai ha ka kyrdan jong ka jylla.
Ïa kane la shim ha ka jingïalang jong ka NEFDC kaba la pynlong ha ka miet jong ka lah sngi U Blei, kaba la pynlong da ka Meghalaya Football Association (MFA) na ka bynta ban ïakren halor kine bad kiwei kiwei ki kam kiba kongsan.
U Lalnghinglova Hmar, President ka NEFDC bad uba long u Myntri ka tnad Sports and Youth Services jong ka sorkar Mizoram, u la pynïaid ïa kane ka jingïalang, ha kaba la don lang u General Secretary ka NEFDC u Kipa Ajay, u Senior Vice-President u Menla Ethenpa, u Vice-President u Bah Hamletson Dohling (uba long ruh u President ka MFA), u Treasurer u Neibou Sekhose bad kiwei kiwei ki nongkitkam.
Haba kren sha ki nongthoh khubor hadien ba la wai ka jingïalang, u Hmar u la ong ba ka NEFDC ka wanrah lang ïa ki jylla ka thaiñ shatei lammihngi ym ban ïakhun pyrshah hynrei ban ïarap iwei ia iwei lyngba ka jingïatreilang, ka jingïakren bad ka jingïasam lang ïa ki rukom treikam kiba bha tam, namar ba ki don ha ki kyrdan bapher bapher ha kaba ïadei ha ka ban kyntiew ïa ka phutbol.
“Ka don ka jingïatylli na ka bynta ban ïalong kawei ha ka ban kyntiew ïa kane ka jingïalehkai ha kane ka thaiñ kaba itynnad,” u la bynrap.
Ka league jong ki klob kaba dangdon hapoh ka jingpyrkhat, ka ban don ruh ïa ka bynta jong ki samla, ka dangdon ha ka kyrdan kaba dang sdang hynrei ka jingïakren ka dangïaid shakhmat ban thaw ïa ka league kaba aiti kyrpang na ka bynta ki paidbah kiba ieit ïa ka phutbol jong ka thaiñ shatei lammihngi, ka thaiñ kaba la pynlong ïa shibun ki bynta jong ka ka jingroi ha ka phutbol jong ka ri India, ha ka kyrdan ïalehkai klob bad ha ki lympung ïalehkai bar ri na ka bynta ka India.
Ha kaba ïadei bad ka Dr T Ao Football Tournament na ka bynta ki kynhun ïalehkai jong ki jylla, u Hmar u la ong ba ïa kane ka jingïalehkai la sdang da ka North Eastern Council (NEC) ha u snem 2009, hynrei ka la sahkut naduh ba la wan ka khlam Covid-19. Ka NEFDC ka thmu ban ïakren bad ka NEC bad ka tnad pynroi jong ka sorkar pdeng ban sdang biang ïa ka.
Ka NEFDC kan sa kyrpad ruh ïa ka All India Football Federation ban ai kyrteng ïa kawei na ki lympung ïalehkai hapoh ka ri da ka kyrteng jong u Dr. Talimeren Ao uba la khlad noh. Ym tang ba u Dr. Ao u la long u kapten ba nyngkong jong ka kynhun ïalehkai phutbol jong ka ri India, hynrei u la long ruh u nongrah lama jong ka India ha ka Olympic Games ha ka snem 1948 ha London. “U Dr T Ao (uba wan na ka jaka kaba la tip mynta ka Nagaland) u la mihkhmat ïa ngi baroh namar ba ka thaiñ shatei lammihngi ka long kaba khlem don jingïapher naduh kito ki por kiba la leit bad haduh mynta,” la ong u Hmar.
Ki nongkitkam ka synjuk ïalehkai jong ka North East Football Development Council na ka bynta ka samoi trei kam kaba saw snem (2024-28) ki kynthup ïa u President u Lalnghinglova Hmar, General Secre-tary u Kipa Ajay, Senior Vice-President u Menla Ethenpa, Vice-President Bah Hamletson Dohling, Vice-President u M. Ratan Kr Singh, Treasurer u Neibou Sekhose, Assis-tant General Secretary u Dr Sang-rang Brahma. Katba ki Executive Member ki long u Amit Chaudhuri, Benel M. Lamthiu, Gebin Kato, L. Jyotirmoy Roy, Phurba Sherpa, Hiren Gogoi, Lalrengpuia bad Bah Cliff Nongrum.
