Shillong, Nailar 28
U MLA/MDC ka Mawhati u Bah Charles Marngar bad uba dei ruh u President ka Managing Committee jong ka Nongjri Presbyterian Secondary School, u pynpaw ïa ka jingsngewkmen kaba khraw hadien ba ki khynnah jong kane ka skul ki la ïoh ban rah ïa ka nam kum ki lahduh ha ka lympung ïalehkai jong ka U-15 Boy’s ka 63rd International Subroto Cup kaba la long ha Bengaluru kaba la long ha ka sngi Balang.
U Bah Charles kum u President jong ka Managing Committee u la ai khublei ïa ka kynhun hadien ba ka la lah ban wanrah nam bad ka burom, bad khlem da klet ban ai khublei ïa u coach u Pynkhrehlang Nongkseh, kumjuh ïa u manager bad baroh kiba don bynta ban pynïaid ïa kane ka kynhun.
U Bah Charles u la ong ba kane kam dei shuh tang ka burom ïa ka Nongjri Presbyterian SS, pynban ka dei ka burom kaba khraw ïa ka dong Ri-Bhoi hi baroh kawei bad ïa ka Jylla hi baroh kawei.
U Bah Charles u la pyntip ba hynne ka sngi katba u dangdon hapoh ka Ïingdorbar thawaiñ, u la ioh ban phone ïa u myntri Rangbah u Conrad K. Sangma ha kaba u la ïathuh ba ha u ba ka kynhun ka khreh ba kan wanphai da ka rel sha la ïing, ïa kaba la sngewthuh ba ha kane ka jingïakren la pynkhreh ban pynbiang noh da ka liengsuiñ ka ban kit ïa kane ka kynhun kaba don baroh 23 ngut ba kan wanphai noh sha la ïing.
