Agartala, Nailar:
Ka tnad pule puthi ha Tripura ka la mad ïa ka jingduhnong kaba khraw namar ka jingshlei um, ha kaba palat 200 tylli ki skul ki la shah pynjulor, kaba kot sha ka T. 11 klur, katba palat 12,000 ngut ki khynnah skul ki la duh noh ïa ki kot-ki sla jong ki. Haba ai jingkren ha ka jingïalang bad ki nongthoh khubor ha kine ki khyndiat sngi ba la leit, u Director ka Secondary Education u N.C. Sharma u la ong ba ki samla pule ki la ïakynduh shibun ki jingeh namar ka jingshlei um.
“Kiba bun ki khynnah pule ha ki skul bad ki kolej ki don mynta ha ki jaka sah ba shipor. Ngi la lum ïa ka kaiphot kaba hashwa namar ba ka jinglong jingman ha ki bynta jong ka Gomati distrik ka dang shah ktah jur. Katkum ka kaiphot, la ong ba ki jingtei kiba kot sha ka T. 11 klur ki la shah pynjulor. Shuh shuh, ha South District, ki la don artylli ki skul kiba la shah pynjulor lut hadien ka jingtwa khyndew kaba jur bha ha kaba ka la ban ïa ki. Katkum ka kaiphot, la ïathuh ba la plie ïa kumba 239 tylli ki jaka sah ba shipor ha ki skul, ha kaba kiba bun na kine ki la shah tap ha ka um. Ngi la trei na ka bynta ban ym pynïakynduh jingeh ei ei ïa ki skul, bad ki School Inspector ha ryngkat ki heh ka District Education, ki la sdang ïa ka kam jong ki. Ki la don Palat 209 tylli ki skul kiba la shah pynjulor. Katkum ka khubor, la ïathuh ba ki don haduh 12,000 ngut ki khynnah pule kiba la duhnoh ïa ki kot namar ka jingshlei um, ha kaba yn sa pynbiang kot da ka State Council of Educational Research and Training (SCERT). Ka kam kaba hakhmat eh jong ngi ka long ban pynkhuid ïa ki skul; lym kumta, ki khynnah ki lah ban mad ïa ki jingeh ha ka liang ka koit ka khiah,” la ong u heh sorkar.
