Aizawl, Nailar:
Ka seng Congress ka la ther da kaba tyngeh ïa u Myntri Rangbah u Lalduhoma bad ïa ka sorkar Zoram People’s Movement (ZPM) halor ka jingsniew jong ki surok ha Mizoram.
Ha ka jingthoh ba la phah ha ka sngi Ba-ar, ka seng Congress ka la kynnoh ba ka sorkar ZPM ka la iehnoh beiñ ha kaba ïadei bad ka jingpynbha ïa ki surok bad kiwei pat ki jingdonkam, ha kaba kane ka la pynïakynduh jingeh shibun ïa ki nongshong shnong ha kylleng ka jylla.
Ka Congress ka la pynpaw shai da kaba ong ba watla u Myntri Rangbah u ju kular bunsien ha ki jingkren ha ka por ilekshon ban weng ïa ki jingeh kiba mih na ka jingsniew jong ki surok, ki la paw ba ki la long tang khyndiat eh ki jingpyntreikam.
Ka seng ka la kynthoh da kaba ong ba katba kiwei pat ki seng saiñ pyrthei ki pynleit jingmut ban pynïoh ïa ka jinglah pyntreikam ha ka saiñ pyrthei, ka jingsngewkhia kaba kongsan jong ki ka long halor ki jingmyntoi jong ki paidbah, khamtam ha ka nongbah jong ka jylla, ha Aizawl.
Ka seng Congress ka la kdew shuh shuh da kaba ong ba ki la don bun tylli ki surok hapoh ka thaiñ Aizawl kiba la sniew bha, kane ka la buh jingeh khamtam haba beh ban leit sha ki kam ba kyrkieh.
Ki la kynnoh ba ka sorkar ZPM kam lah ban pyntreikam halor ki jinglong jingman kumba ki long mynta. Ka seng ka la kynnoh ruh ba hadien ba ka sorkar ZPM ka la wan ha ka bor synshar, katto katne ki projek shna surok ki la sahkut khlem pyntreikam bad kane ka buh jingma bha ïa ki paidbah.
Ka seng Congress ka la ong ba ka Public Works Department (PWD), kam shym lah ban leh ei ei na ka bynta ban pynurlong ïa ki jingkular halor kine ki jinglong jingman.
Halor kane ka jingeh kaba ki nongshong shnong ki ïakynduh, ka seng Congress ka la dawa ba dei ban leh noh mardor na u Myntri ka tnat PWD bad na ka sorkar ZPM ban weng noh ïa ka jingbuh jingeh jong ki surok khlem da pynslem shuh.
