Ka jingïap jong u heh ka seng Awami League, u Ishaque Ali Khan Panna, na ka bri kwai kaba don ha ka shnong Dona Bhoi kaba dang hap ha East Jaiñtia Hills bad kaba jngai tang kumba 1.5 km na khappud India-Bangladesh, ka la pynmih ïa kiba bun ki jingkylli. Hynrei kawei na ki jingkylli bakongsan ka long ba hato u Panna u la shah pynïap ha India ne ha Bangladesh? Ki pulit ka East Jaiñtia Hills ki la pyntip ba dei ki nongshong shnong ka thaiñ Dona Bhoi kiba la ïohi bad lap ïa ka metïap bad hadien kata ki la pyntip sha ki bor jong ka aiñ ban leh ïa kaba donkam. Nalorkata, ki pulit ki la lap ba ka la don ka ‘Passport’, ka kot ba pyndonkam haba leit jingleit na kawei ka Ri sha kawei pat, ha ka met jong u Panna.
Katkum ka kaiphod jong ka ‘post-mortem’ ba la leh ha Civil Hospital, Khliehriat, hadien ba ïa ka met jong u Panna la lap ha ka 26 tarik Nailar, 2024, la ong ba une u briew u la ïap na ka jingshah ksih. Hynrei ym pat lah ban pynthikna ha kano ka jaka u la ïap. Hadien ba lap ïa ka met jong u Panna, ka sorkar jylla ka la ïakren bad ka High Commission jong ka sorkar Bangladesh, hadien ba la ïoh ïa ka jingbthah na ka tnat Korbar Ri bad Bar Ri jong ka Sorkar India, ban pynthikna ba ka met kaba sah jong utei u nongïalam ka Awami League kan poi beit sha Bangladesh.
Ka met kaba sah jong u Panna kan poi sha Bangladesh ha ka 31 tarik Nailar, 2024 lyngba ka Dawki Land Port hadien ba la wan kit na Khliehriat. Uwei na ki bahaïing jong u Panna u la wan poi ha Meghalaya ban pyndap ïa ki kot ki sla hashwa ban shimti ïa ka met, bad ban rah sha ka ïing sah jong u Panna kaba don ha Pirojpur distrik jong ka Bangladesh. Lah ban kdew ba ki lad pathai khubor na Bangladesh ki dei ki banyngkong ban pynbna ba u Panna u la khlad ha Meghalaya hadien ba u la phet na Bangladesh. Hynrei na ka liang ki shipai BSF ki la kyntait ïa kane bad ki kam ruh ba u Panna u la shah siat ïap ne shah bom ïap ha u paidbhur ha Bangladesh.
Hynrei, ka jinglap ïa ka metïap kaba la sdang pyut jong u Panna na Dona Bhoi ha East Jaiñtia Hills ka la pynlyngngoh ïa kiba bun. Ki khubor ki ïathuh ba katkum ka kaiphod jong ka ‘Post-Mortem’ ba la leh halor ka met jong u Panna ha Civil Hospital, Khliehriat, la shem ba u Panna u la khlad namar ka jingshah ksih. Lah ban kdew ba u Panna u dei u General Secretary barim ka Bangladesh Chhatra League (BCL), kaba dei ka kynhun ki samla pule jong ka seng Awami League ba la ïalam da ka Sheikh Hasina, ka Myntri Rangbahduh barim ka Bangladesh kaba la hiar shuki ha ka 5 tarik Nailar bad kaba la wan phet sha India ha kajuh ka India.
Ka sorkar India bad ka sorkar Meghalaya ki dei ban ïa pynthikna ba kan don da ka jingtohkit kaba bniah halor ka jingïap jong u Panna khnang ba ki jingshisha kin mih kumba ki dei ban long. Bad lada u shah pynïap ha Bangladesh, kane ka dei ban paw khnang ba kan lait sah sniew ka Ri India bad ka jylla Meghalaya. Baroh ngi tip ba hadien ka 5 tarik Nailar, 2024, kiba bun na ki nongïalam ka Awami League ki la ïaphet rieh namar ka jingshah thwet ha kiwei pat ki seng ne ki kynhun kiba pyrshah ïa ki. Ki la don ruh ki Myntri ha ka sorkar jong ka Sheikh Hasina kiba la shah kem namar ki jingkynnoh kiba bun. Don ruh kiba la pyrshang ban phet na Bangladesh. Lehse u Panna, kumba la paw ha ki lad pathai khubor ha Bangladesh, u la pyrshang ban phet sha India ban lait na ka jingshah kem ha ki pulit ne ka jingshah thwet ha kiwei pat ki seng saiñpyrthei.
Ka sorkar jylla ka dei ban thung da ka kynhun tohkit bakyrpang bad ban pan jingïarap na ka Sorkar Pdeng ban pynkhlaiñ ïa ka jingtohkit. Ha kajuh ka por dei ban pynsted ïa ka jingtohkit khnang ba ki bahaïing hasem jong utei uba la khlad kin tip ïa ki jingshisha. Kaba kum kane ka khep ka lah ban dei ka banyngkong ba ka sorkar Meghalaya ka ïakynduh bad namarkata kan hap ban peit bha hashwa ban ai ïa kino-kino ki jingkynthoh. Ngi kyrmen ba ki jingshisha kin paw kumba ki dei ban long.
