United Nations, Nailar:
Ka United Nations ha ka step Sngi Palei, ka la pyntip ba kawei na ki kali ai jingïarap jongka kaba don hapoh ka nongbah Gaza, kaba la buh dak da ka shap jong ka seng, ka la shah siat haduh 10 sien ha ki shipai Israel, kynthup ïa ki jingsiat kiba la thmu ïa ki jingkhang ba shakhmat jong ka, watla katei ka tnat ka long shi bynta jong ka kynhun kaba la ïatreilang pura bad ki shipai Israel. U
nongaiktien jong ka UN, u Stephane Dujarric, ha ka Sngi Palei u la iathuh ba 2 ngut ki nongtrei kiba don hapoh jong katei ka kali, kim shym la mynsaw satia hynrei ka kali ka la julor na ki bynta ba shabar bad utei u heh u la kdew ruh ia ki jingkynthoh ba la kren da uwei u heh jong ka UN u bym shym kwah ban pynpaw kyrteng, uba la dep kren lypa bad ong ba ka UN ka donkam ban ioh da ki kali kiba la shna kyrpang ban ai jingiada haba ki don ha katei ka bynta jong ka nongbah Gaza bad kaba ki dkhot jong ka tnat ki hap ban don hapdeng jong ka thma, khnang ba kin ioh ban pynbit- pynbiang bad ban iarap ia ki paidbah nongshong shnong kiba don ha katei ka nongbah.
Kumta, u la ong ba kane ka jingjia ka la pynpaw shai ia ka jingdonkam jong kitei ki kali ‘Armor’ namar dei tang da kitei ki jait kali ai jingiada kiba lah ban pyllait im ki nongtrei jong katei ka tnat kiba hap ban don ha katei ka jaka bad ha kajuh ruh ka por pat, ka Un ka la pynpaw ka jingsngewkhia naba ka jingiatrei lang jong ka UN bad ki shipai ka Israel ka long kaba sep-ei lada kim kheiñ ne ñiewkor ia ka jingiatrei lang, da kaba thombor wat ia ki briew bad ki kali kiba dei ki jong katei ka tnat.
Hynrei u Dujarric u la pynthikna ba ka UN kan iai bteng ban iatreilang bad ki shipai Israel hynrei ka Israel ka dei ban shimkhia ban pynthikna ba kum kine ki jingjia kin nym jia biang hadien- habud.
U nongaiktien jong ka pyrthei u la ban jur ïa ka jingdonkam ba baroh ki liang ki dei ban burom ïa ka aiñ jong ka pyrthei ha man la ka por, kaba kynthup ïa ka jingïada ïa ki riew paidbah bad ka jingpynbiang ïa ki jingdonkam ba kongsan jong ki, kum ka bam, ka um, ka jaka sah, bad ka jingsumar pang, ha kano kano ka jaka ba ki don ha Gaza.
