Kyiv, Risaw:
Ka Ukraine ha ka Sngi Palei, ka la kynnoh ba ka Russia, ka la thmu ban thombor ïa ki riew paidbah, hadien ba 30ngut ki briew, ki la iap, ha kaba ar tylli ki bos, ki la shah pynbthei ha ka nongbah Kramatorsk, kaba don ha khmat eh, ha kawei na ki jing thombor, kaba la pyniap briew tam ha kine ki taiew.
U President Volodymyr Zelensky, u la byrngem ba katei ka jingshah thombor “kan nym sah khlem jubab” hadien ba ki dur ba la pynmih da ki bor synshar shnong, ki pyni ïa ka shyntur nar jong ki kali, kaba la shah thang, ha kaba ki metïap bad ki sboh, ki la bthei ha kylleng ka surok.
“Ka Russia, ka pyrshang ban pynduh pyndam ïa baroh ki jingim ha (ka) Donbas (thaiñ) bad ka pyrthei, ka dei ban jubab ïa kane,” ong U Zelensky, ha ka Telegram, ha kaba u maham, ba ka jingïap, ka lah ban nang kiew.
U Secretary jong ka US, u Marco Rubio, u la maham ba ka jingsahkut kaba mynta hadien ba la jan san snem ka jingïaleh, ka long kaba “ma bha” bad ka lah ban wanrah ïa ka jingjur jong ki jingeh.
U Zelensky u la pynthikna ba ki nongïakren jong ka Ukraine ki la leit sha America ban ïakren ha ka sngi palei bad sngi saitjaiñ bad ka kynhun jong ka US.
“Ngi dang khmih lynti ruh ïa ka kynhun na Europe ban ïasoh bad ka kynhun ïakren jong ngi,” u la bynrap.
Ki tyllong khubor jong ka America, ki iathuh ha ka AFP, ba la khot ïa ki ophisar na Britain, France, Germany, NATO bad ka European Union sha katei ka jingiakren.
“Kin sa ïakren halor ki jingmut bad ki jingtyrwa ba thymmai kiba ki nongïakren jong ka America ki la sdang ban pynwandur bad ki nong Russia bad ki nong Ukraine ha ka jingleit jngoh jong ki dang shen sha katei ka thaiñ”, la ong kawei na ki tyllong khubor jong ka US kaba tip bha ïa ki jingïakren ha ka AFP.
“Baroh ki sngew lyngngoh ïa ka jingkhriat. Kan long ka jingkhriat kaba eh lada ka thma kam sangeh,” la ong ka tyllong khubor jong ka US.
