Bhubaneswar, Risaw:
Phra snem hadien ba la dep ban pynlong ïa ka jingthep vote kaba khatduh, ki khynnah pule jong ka kolej bad ki skulbah jong ka Odisha kin jied ïa ki nongmihkhmat jong ki ha ka 15 tarik u Risaw, la pynbna ka sorkar jylla ha ka lah sngi U Blei.
Ka sorkar ka la pynmih ïa ka por ba bniah na ka bynta ka elekshon sha ki seng jong ki samla pule bad kiwei kiwei ki seng bad ki seng samla pule ha ki skulbah jong ka jylla, ki kolej sorkar bad ki kolej ba la ithuh da ka sorkar na ka bynta ka snem pule 2026-27.
Ka Higher Education Department (DHE) ka la ong ba ïa ka jingpynbna elekshon ba pura yn pynmih da ki kolej bad ki skulbah ha ka 7 tarik u Risaw, katba ka jingthep kyrteng, ka jingpeit bniah bad ka jingpynmih ïa ki kyrteng kiba biang kan long ha ka 9 tarik u Risaw.
Ki nongïakhun ki lah ban weng ïa ka jingpynrung kyrteng ha ka 10 tarik, Risaw, ha kaba ïa ki kyrteng jong kiba dei ban ïakhun elekshon yn sa pyllait ha kane kajuh ka sngi. Ïa ka jingïalang ba la tip kum ka ‘Why I Stand For’ yn sa pynlong ha ka 14 tarik, Risaw.
Ka jingthep vote kan long ha ka 15 tarik u Risaw naduh ka por 8 baje mynstep haduh ka por 2 baje janmiet, bud sa ka jingñiew bad pynbna ïa ki nongjop naduh ka por 2 baje janmiet ha kajuh ka sngi.
Ka jingshim smai kan long ha ka por 11 baje mynstep ha ka 16 tarik u Risaw, ïa kaba yn rakhe ruh kum ka sngi ba la buh kyrpang.
Ka sorkar ka la buh ruh ïa ka jingpynlut jong uwei pa uwei u kyrtong ha kaba ïalap.
U M yntri Rangbah ka jylla u Mohan Charan Majhi u la ong ba ka elekshon kam dei kaba shu leh ryntih hynrei ka dei ka rynsan kaba kongsan ïa ki samla ban ïashim bynta, ban mihkhmat bad ban kyntiew ïa ka jinglong nongïalam.
“Ka sorkar barim ka la pynsangeh noh ïa ki jingthep vote da kaba ai daw kawei hadien kawei pat. Kumta ka pateng baroh kawei ki samla pule ki la duh noh ïa ka lad ban ïashim bynta ha ka rukom synshar paidbah,” u la ong.
“Ngi la kular ïa ki samla pule jong ka Odisha ba kane ka hok synshar paidbah kan sa ïoh biang bad mynta ka sngi, ngi la pyndep ïa kata ka jingkular. Ki samla kiba sngewskhem bad ka synshar paidbah kaba shlur ha ki jaka pule ka long kaba donkam bha ban tei ïa ka Odisha kaba roi bad kaba kiew shaphrang,” ong u Majhi da kaba kyntu ïa ki samla pule ban ïashim bynta ha ka elekshon da ka jingkmen.
U Myntri ka Higher Education u Suryabanshi Suraj u la ong ba kane ka sienjam kan ailad ïa ki samla pule ban kyntiew ïa ka sap nongïalam.
“Ka elekshon seng samla pule la pynlong khatduh eh ha ka jylla ha u snem 2017. Ngi la kular ha ka mat treikam jong ngi ba ngin pynim biang ïa ka bad sdang ïa ki sienjam ban pynlong ïa ka elekshon seng samla pule ha ki jaka pule ba kham heh”, la ong u Suraj.
U la bynrap ruh ba hadien ba la thaw sorkar ha u bnai Jylliew, 2024, ka sorkar ka la shim por ban pynbeit ïa ki mat bad ki jingeh kiba ïadei bad ki jaka pule shwa ban rai ban pynlong ïa ka elekshon naduh mynta u snem.
Ka DHE ka la bthah ïa ki samla pule ba pura ba man ka por kiba wan skul 75 percent bad ym don jingsahteng ha ka jingpule kum ka kyndon ban long kiba lah ban long ki kyrtong.
Ki samla pule kiba pynrung kyrteng lyngba ka jingpule na jngai ne ka PPP rukom bad kiba pynrung kyrteng ha ki jingpule kiba pynlut pisa hi kin ym lah ban ïashim bynta.
Ki samla pule kiba don ki rekod leh kam sniew ne kiba dang sahkut ha ki jingshah pynshitom ruh la khang ban ïakhun ïa ka elekshon ha ka jaka pule.
Kane baroh ka long kumba la pynbeit da ki bor ba dei khmih bad ka jingbud ryntih ïa ki kyndon.
Ki heh jong ka Higher Education ki la ong ba ki kyrtong kin ïoh tang kawei ka lad ban ïakhun ïa ka kam nongkitkam bad ar tylli ki lad ban ïakhun ïa ka kam executive-member.
Yn pyrkhing bha ïa ka jingïalap elekshon, da kaba khang ban shon ïa ki poster bad ki kot lyngkdop.
Yn shah tang ïa ki poster ba la shna da ka kti ha ki jaka ba la buh kyrpang jong ka jaka pule. Yn khang ruh ban pyndonkam da ki tynghung pynsawa, ki kali bad ki mrad na ka bynta ban ïalap elekshon.
La khang pyrshah pura ïa ka jingdonkti ha ki seng saiñ pyrthei bad ki kyrtong kim lah ban wad vote katkum ka jaitbynriew ne ka kynhun. La maham ruh ïa ki ban ym pyndonkam ïa ki jingthoh thok ba la pynmih da ka AI.
Ka elekshon seng samla pule ka la pynlong khatduh eh ha Odisha ha u snem 2017.
Ka sorkar BJD barim ka la pynsangeh noh ïa ka jingthep vote ha u snem 2018, da kaba kdew ïa ki mat ba kynthup ïa ka jingdon ka erïong Titli, ki jingkulmar kiba ïadei bad ki jaka pule bad hadien kata ka khlam Covid-19.
Hadien ba ka la wan ha ka bor synshar ha u snem 2024, ka sorkar BJP ka la pynbna ba yn pynim biang ïa ka elekshon seng samla pule.
