Hyderabad, Risaw:
Ka New Employees Health Scheme (NEHS) jong ka sorkar jylla, kaba la pyntreikam ha u bnai Naitung na ka bynta ka jingmyntoi jong ki nongtrei sorkar, ki nongïoh penshon, bad kiba haïing hasem jong ki, haduh mynta ka la pynrung kyrteng ïa ki 919 tylli ki hospital bad mynjur ïa 15,395 tylli ki jingsumar kiba shongdor T.104.63 klur.
Katkum ka jingïathuh ki heh sorkar, na ki 919 tylli ki hospital, 778 tylli ki dei ki riew shimet bad 141 tylli ki dei ki jaka sumar sorkar. Ïa ka tnad pulit ruh la wanrah hapoh kane ka skhim naduh ka 1 tarik u Nailur.
Ka skhim ka ai jingsumar khlem pisa lyngba ki 1,816 tylli ki jingai jingsumar jong ka CGHS, kaba kynthup ïa ka jingsumar, ki dawai, ki jingleh Test ïa ka jingpang, ki tiar pyndonkam, ki tiar ba thep shapoh ka met, bad ka jingsumar kaba ïai bteng.
Hapoh kane ka skhim, ki nongïoh jingmyntoi ki lah ban leit sha ka hospital ba la buh kyrteng beit ha ka por ba donkam kyrkieh khlem da donkam ban phah sumar lypa. Ka hospital ka hap ban pyntip sha ka tnad ka koit ka khiah hapoh ka por ba la buh.
Ha kaba ïadei bad ki jingshakri jong ki OP, uwei u heh sorkar u la ong ba kane ka skhim ka kynthup ruh ïa ki jingshakri ba shabar, kynthup ïa ka jingïamir jingmut bad ki doktor, ki jingleh test ïa ki jingpang, bad ki dawai ha ki jaka sumar.
Kumba ka long mynta ki don 12 tylli ki Wellness Centre kiba treikam ha ki 12 tylli ki distrik. La tyrwa sa 25 tylli ki jaka sumar, kaba lah ban pynlong ïa ka jingkheiñ baroh sha ka 37 tylli. Kumjuh ruh ki card ba ïadei bad ka koit khiah kim dei kiba donkam, bad ki nongïoh jingmyntoi kiba dei hok kim lah ban shah kyntait ban shah sumar tang namar ba kim don ïa ka card.
Haduh ka 28 tarik, Nailur, ki Health Card jong ki 12,56,962 ngut ki nongïoh jingmyntoi ki la don, katba 7,56,210 ngut ki la Download ïa ki card jong ki.
Na ki bynta ba la mynjur, 3,192 ngut ki dei ki nongtrei bad 5,669 ngut ki bahaïing jong ki. Napdeng ki nongïoh penshon, la mynjur ïa 4,042 tylli, ryngkat bad 2,492 tylli kiba ïadei bad kiba haïing hasem jong ki.
Hapoh kane ka skhim, ki nongtrei bad ki nongïoh penshon ki ai 1.5 percent na ka Basic Pay lane ka penshon jong ki, bad ka sorkar ka ai ka jingnoh synñiang kaba mar katjuh. Kane ka pynmih kumba T.88 klur man u bnai.
Ka jingmang pisa shisnem na ka bynta kane ka skhim la antad ba kan long T.1,056 klur. Ka sorkar ka la pyllait ruh T.70 klur sha ki bai EHS kiba rim, katba sa T.100.52 klur ka dang sahteng, la bynrap shuh shuh u heh sorkar.
