Vijayawada, Risaw:
Ka sorkar jylla Andhra Pradesh ha ka sngi Balang ka la pyntip sha ka ïingbishar ba hakhliehduh jong ka jylla ba ka la thaw ïa ka komiti ai jingmut ban ïada ïa ki dieng ban pynthikna ba ki dieng kin ym shah pynkhyllem pathar na ka bynta ki kam pynroi, bad ha ka jaka jong ki kin shah thung ha ka jaka ba lah.
Ka sorkar ka la ïathuh ha ka ïingbishar ba kano kano ka tnad kaba tyrwa ban weng ïa ki dieng na ka bynta kano kano ka projek, ka dei ban leit sha katei ka komiti, ka ban bishar bniah ïa katei ka jingtyrwa, bad ban shim ïa ka rai kaba biang. Ka la pyntip ruh sha ka ïingbishar ba la pynkhreh ïa ka kot jinghikai kaba batai bniah ïa ki rukom thung dieng khlem da pom ïa ki.
Haba shim khia ïa ki jingai jingmut, ka kynhun nongbishar, kaba kynthup ïa ka Chief Justice Lisa Gill bad ka Justice Challa Gunaranjan, ka la bthah ïa ka sorkar ban thaw ïa ka rukom treikam lyngba uno uno u nongshong shnong u lah ban ujor pyrshah ïa ka jingpom dieng khlem da kheiñ snep. Ka kynhun nongbishar ka la ong ba dei ban peit bniah kloi ïa ki jingujor, bad ka la bthah ïa ka sorkar ban wanrah ïa u nombar ba khlem jingsiew, nalor ka lad email ban pdiang ïa ki jingujor.
Ka ïingbishar ka dang shong bishar ïa ka Public Interest Litigation (PIL) ba la mudui da u Asmad Mohammed Sheikh Shah, uba pule doktor na Guntur, uba la kynnoh ba ïa ki dieng kiba heh la shah pom khlem da kheiñ snep ha ka kyrteng jong ka jingpynheh surok, ka jingbuh bad maramot ïa ki laiñ bording bad kiwei kiwei ki kam sorkar. U nongujor u la pan jingbthah ban pynkylla ïa ki dieng ha ka jaka ban pom ïa ki.
Ha ka jingbishar kaba kham mynshwa, ka High Court ka la pynpaw ïa ka jingsngewkhia kaba jur halor ka jingpom dieng khlem da pyrkhat na ka bynta ki projek sorkar, da kaba ïohi ba kum kane ka kam ka buh jingma kaba khraw ïa ka mariang.
Ka la ïohi ba ka jingïada ïa ka mariang ka dei ka jingkitkhlieh lang, bad ka la bthah ïa u Chief Secretary ban thaw ïa ka komiti kaba kynthup ïa ki ophisar na ki tnad bapher bapher bad ki riew shemphang ha ka mariang ban ai jingmut ïa ki lad ki lynti ban tehlakam ïa ka jingpom dieng bad ban pyntreikam ïa ka jingthung bujli.
