Guwahati, Nailur:
Ha ka jingïai bteng ban pyntreikam pyrshah ïa ki kam khaïi drok, ki pulit jong ka Assam ki la ïoh ban kem ïa ki nongkhaïi drok bad ruh ban kurup ïa 1 lak tylli ki kuli Yaba, ha kaba la antad ba ki la kot sha ka T. 30 klur, ha Karimganj distrik ha ka Sngi U Blei.
Ka jingpyntreikam ha ka jingleit khynra ka la long hapoh ka jingïalam jong u Superintendent ka Karimganj District u Partha Pratim Das.
Ka la pynkhlaiñ ïa ka jingleit khynra da kumba shi kynta ha ka surok National Highway 6 ha Badarpur, ha kaba ki pulit ki la ïoh ban bat ïa ka kali Creta, kaba don ïa u Registration Number AS 01 DL 1510, bad lap ruh ïa kine ki jingdih pynbuaid ba la song bha bad buhrieh hapoh jong ka.
Ïa ki briew kiba la shahkem la tip kyrteng kum u Ashraf Ali, Abdul Hannan, bad u Pradeep Das, kine baroh ki dei na Katigorah kaba don ha marjan jong ka Cachar distrik.
Na ka jingpynlong ïa ka jingtohkit, la lap ïa ka jingshisha ba kine ki dawai kuli Yaba ki dei kiba la wanrah na Mizoram halor ka jingthmu ban pynpoi ïa ki sha Patharkandi kaba don ha Assam.
Kine kiba la shahkem ki dang don mynta ha kti jong ki pulit ka Badarpur ha kaba ki heh pulit ki dang ïaid shakhmat ban pynlong ïa ka jingtohkit khnang ban lap dien shuh shuh ïa ka kynhun kaba ju don bynta ha ki kam khaïi drok bad ban ithuh ïa kiwei pat ki runar kiba don bynta lang ha kane ka kam beaiñ.
