U Nongsaiñ Hima, 1969
Ka jaidbynriew ka ban kiew ka don bad ka jingpynmih ki Nongïalam kiba kloi ban aiti ïalade na ka bynta ka jingbha, jingroi bad jingïaid shaphrang jong ka jaidbynriew.
Ka jaid bynriew ka ban kiew ka don bad ka pynmih ki Nongïalam kiba iohi jngai bad ïalam ïa u paidbah ka ri lyng-ba kata ka lynti kaba ki la iohi haduh ban da poi tiap haba thmu. Ki la iohi lypa ba don aiu ha kata ka lynti, la don ki liew lep, ne ki bseiñ ne kino kino ki jingeh bad kumta ki pynkhreh lypa ban ia kynduh ïa kita ki diengpynkiang bad hikai ia u paidbah ban shlur bad ban nym kynran dien.
Ka jaidbynriew ka ban kiew ka don bad ka pynmih ki Nonïalam kiba ïai shah, ba shlur, kiba kloi ban kohnguh. Kim tharai stad ne tip lut ba tang ma ki kiba stad hynrei ki iohi bad sngap ruh ïa ka jingmut jingpyrkhat jong kiwei pat.
Kyntang ïawai, ka jaidbynriew ka ban kiew ka don bad ka pynmih ki Nongïalam kiba pyndep hok ïa la ki kamram jong ki kiba man la ka sngi – kine ki kynthup ïa ki kamram kiba ïadei ïalade shimet, kamram kiba ïadei bad la ka ïing ka sem, ki kamram kiba ïadei bad la ki para marjan marpa bad ki kamram kiba ïadei bad la U Trai Nongthaw.
Kum ha kata ka jaidbynriew ka don ki ïing ki sem kiba bha. Wei haba la don kum kita ki ïing ki sem khlem pep kita ki ïing ki sem ki long ka SHLEM kiba saiñdur ïa kita ki ban long ki rishot jong ka ri bad ka jaidbynriew. Kum ha kata ka ïing la kheiñ kor ïa ki khyllung ki khynnah ba kin san ha ka akor, ka jingkohnguh, ka jingnang jingstad, ka jingsngewrit, ka jingpyndep hok ïa la ki kamram. Kum ha kata ka ïing khlem pep kita ki khynnah rit kynthei bad shynrang – kin san ym tang ha ka met kumjuh ha ka mynsiem kaba khlaiñ bad ban tip ïa la u Nongthaw. Ym don ka skul kaba kham bha ban ïa la ka ïing ka sem ha kaba u kpa bad ka kmie ki long ki nuksa kiba im bad bym ju lip bad dei hangne ruh la hikai ïa ki ïa ka jingkohnguh jingsngewrit, jingbat ïa ka por, ka jingïaishah, ka jingsngewthuh ïa ki jingeh jong kiwei, ka jingïatreilang ban pyndep ïa ki kamram kiba dei jong kata ka iing bad ka jingsheptieng ïa la u Trai Nongthaw.
Phi tharai kum ha kata ka jaidbynriew kaba don kum kine ki ïing,dang lah ban don ka jingsheptieng, ba kum kata ka jaidbynriew kan nym ïaid shaphrang ?
Ngi ieh haphi bad ha ka mon, bad jingpyrkhat kaba laitluid jong phi ban sangeh khyndiat bad puson.Ka shong ha nga ha phi ba kumno ïa ki khun ki pyrsa kiba dang rit ngi hikai, pynmlien bad ngi kitkhia ïa ki.
“Ma phi baroh ruh ko khun ko pyrsa,
To ioh ho ka akor ba bha shisha;
Ba phin tang sah la ka nam ka burom.
Ba phin tang roi tang pa man ka aiom;
La phi ïaid phi ïeng sharum shaneng;
To sngewrit kynthup wat ju mlien sngewmeng
To pynmlien ban nang na la ïing nyngkong;
Da kumno ban ïeng da kumno bam shong;
Da kumno ban ïaid da kumno ban jam,
Da kumno ban dih da kumno ban bam;
Da kumno ban kren da kumno ban peit,
Da kumno ban ban da kumno ban leit,
Da kumno ban tei dakumno ban ktah,
Da kumno ban kit da kumno ban bah,
Da kumno ban kup da kumno ban sem,
Da kumno ban da la ka riam ka rem;
Da kumno ban phong da kumno ban spong,
Da kumno ban sad lane ban khyllong,
Da kumno ban kner da kumno ban shim.
Da kumno ban mer da kumno ban im.
Da mut, da khan, wat sarong, wat kyreit,
La ha shnong lane ha ka wan ka leit;
Kane kam long, ka kam thamula ne kai
Hynrei ka long ka tynrai na U Trai.”
