Bengaluru, Nailur:
Ka kam bamsap ha MUDA kaba la paw ha ki lad phah khubor kaba la jia ha Karnataka ka la shah pynkynriah sharud da ka jingmih sa kawei pat ka kam bamsap kaba thymmai kumba la kynnoh ba ka la don sa kawei pat ka jingpyndonkam bakla ïa ka pisa kaba la kot sha ki klur tyngka ba la mang na ka bynta ban ïakhun pyrshah ïa ka jingpang Covid ha ka por ba synshar ka sorkar BJP ha ka jylla da u Myntri Rangbah ha katei ka por u BS Yeddiyurappa ha kaba ki la mih ki jingkynnoh ba ki la don ki kam bamsap.
Katkum ka jingkhmih bniah na ki kaiphot ba la ïohlum hashwa ha kaba ïadei bad kane ka jingjia da u Justice John Michael D’Cunha la dep ban ïakren ha ka kynhun Myntri hynnin ka sngi, ha kaba la ong ba la lap ba ki la don shibun ki jingdkoh treikam.
Na kine, ki tyllong khubor ki la ïathuh ba u Myntri Rangbah u Siddaramaiah u la ïakren halor ki lai tylli ki mat kiba kongsan ha ka jingïamir jingmut ha ka jingïalang. U la ong ba u nongbishar u la khmih bniah naba ki la don ki jingbamsap kiba ka kot sha ki hajar klur tyngka na ka jingpyndonkam bakla.
Ka kaiphot ka la ïathuh ba ki la don ruh shibun tylli ki File kiba la jah ïa kiba ym pat rah hakhmat jong u wat lada u la kyrpad ban leit rah, la ïathuh shuh shuh ka tyllong khubor.
