D. H. Kharkongor
U Vincent H Pala, uba dei u President jong ka Meghalaya Pradesh Congress Committee, u la kynnoh kynthoh ba u Symbud Myntri Rangbah jong ka jylla ka jong ngi, u Sniawbhalang Dhar, u long thik kum u nongaiktien jong ka RSS bad ka BJP. U Vincent H Pala u pynshongnia ïa katei ka jingkynnoh kynthoh ka jong u ïa u Sniawbhalang Dhar halor ka nongrim ba u Sniawbhalang Dhar um banse ban kohnguh ïa kat kaba ka RSS bad ka BJP ki bthah ne ki hukum ïa u. Hana u Sniawbhalang Dhar um banse ban kohnguh namar ka jingtieng ka jong u ïa ka aiñ, namar kata ka jingdonkti ka jong u ha ki kam be-aiñ kum ka kam khaiï ïa ki jingdih pynbuiad bad ka kam khaiï tuh ïa u dewïong ba la khlong be-aiñ. Hana u Sniawbhalang Dhar u tieng u kyiuh that-that ïa ka BJP halor ka nongrim ba ka BJP ka ju pynshitom tyngeh ym tang ïa kat kiba shlan ban kren pyrshah ïa ka hynrei haduh ïa ki bym kohnguh ïa ka ne kiba nud ban ïaleh pyrshah ïa ki jingbthah ki jong ka. Kaba katno tam ïa kiba ym tang ba ka shu suba hynrei kiba ka da iohsyndon ruh de da ki sabut kiba biang ba ki dei kiba juleh jukam ïa ki kam be-aiñ.
Ka jingkynnoh kynthoh kaba wat u Mukul Sangma, uba dei u ‘Leader of the Opposition’, u da shim khia bha kat haduh ba u da kut jingmut ba un sa thoh sha u Myntri Rangbahduh jong ka Ri India, u Narendra Modi, kum ka jingpyntip kaba kyrpang. U da khmih lynti ba ym tang ba u Narendra Modi un shim khia da kaba un phah tohkit bniah halor kita ki jingkynnoh kynthoh hynrei ba un da pynshitom syndon hi ruh ïa u Sniawbhalang Dhar, kat kum ki kyndon jong ka Aiñ, kata, lada kata ka jingtohkit kaba kyrpang kan lap ba kitei ki jingkynnoh kynthoh ki dei kiba shisha. Te wat u Kyrmen Shylla, uba dei uwei na ki Myntri jong kane ka Sorkar MDA – 2, u da sngewdei ba kane ka Sorkar kan shim khia bha halor kitei ki jingkynnoh kynthoh ïa u Sniawbhalang Dhar. Kat kum u Kyrmen Shylla, lada lap ba kitei ki jingkynnoh kynthoh ki dei kiba shisha, ïa u Sniawbhalang Dhar ym dei shuh tang ban shu weng beit noh na kane ka kynhun myntri hynrei haduh kaba beh krad noh syndon shabar ïa u, na kane ka jylla Meghalaya.
Lah ban ong ba ïa mynta ngim tip lada kitei ki jingkynnoh kynthoh ki dei ne em kiba shisha ne ki dei pynban tang ka jingpynthoh bria lane ka jingbiah phong-rai. Kaba ngi tip shai kdar ka long ba kitei baroh 3(lai) ngut ki dei ki nongsaiñ hima sima ne ki ‘Politician’. Ngi la ju sakhi, kumba ngi ju ïohsngew, ba ka saiñ hima-sima kam ju lait na kiei kiei kiba jaboh jakhlia. Ngi ïa tip shai pat ruh ba nalade ka saiñ hima sima ne ka ‘Politics’ kam jaboh jakhlia. Ka jingjaboh jingjakhlia, jong ka saiñ hima sima, ka dei na ka daw jong ki nongsaiñ hima sima kiba jaboh jakhlia. Kin dang ïaijaboh jakhlia wei ba ngi da don shisha hapdeng jong nga jong phi kiba ioh ïa ka ‘myntoi shimet’ naka jingjaboh jakhlia ka jong ki nongsaiñ hima sima, kiba jingjaboh jakhlia. Ki ‘riew jaboh jakhlia ki ban ‘ïap ja’ jin lada ki nongsaiñ hima sima ki dei kiba khuid kiba suba.
Nga shim ïa kane kaei kaei kum ka kabu ban pynkynmaw ba ki bym beit jinglong kim ju sngewtynnad hynrei ki wit bad ki salia bha ïa ki briew kiba beit jinglong (morally upright). Ka long shisha kumta wei ba kiba beit jinglong ki long thik kum ki diengpyngkiang ïa ki bym beit jinglong. Kiba kynriang jinglong (morally corrupt) kim ju sngewtynnad, da lei lei ruh em, ïa uno-uno uba nud ban kren ïa ka jingshisha (Truth). Ngan pynkynmaw biang ruh ba ka jingshisha (Truth) kan ïaisah junom ka jingshisha wat lada ngi baroh ngim treh ban pdiang ïa ka, ba ka dei ka jingshisha. Kaba dei (Right) ruh kan ïaisah hi kaba dei wat lada ngi baroh ngim treh ban pdiang ne leh ïa ka. Kaba bakla (Wrong) pat ruh kan ïaisah hi kaba bakla wat lada ngi baroh ngi kyntait ba ka dei kaba bakla, kat ban leh pynban ruh ïa ka. Ngi da im pat ruh ha ka juk kaba ngi suk mynsiem wat ban pynrem (condemn) ïa uba ksan (innocent), da kaba pynksan (justify) pat de ïa uba rem (guilty).
Ka long lehnohei ban pynrem jubor ïa uba dang im ka jingïatiplem (conscience), uba don ïa ka jingïadei (relationship) kaba jan bad kaba maïan bad la U Blei. Kam pher ïa uba kum uta wei ba ka jingïatiplem, kaba dang im hapoh jong u, kan nym pynrem ïa u. Kam pher lada un rem ha khmat u briew naba u ksan pat de ha khmat jong U Blei, uba tip ïa baroh ki jingshisha. Uba kum uta u briew un nym suitñiew lymne duh thiah duh dem, ïa kaei kaei ruh kaba u tip shai kdar ba ka dei beit thik tang ka jingkawang ktieh lane tang ka jingbiah pongrai (character assassination) ïa u. Un nym sngewmong lymne sngewbitar ïa kata kaei kaei. Kaba katno tam kat haduh ban pynshitom ïalade da kaba leit kiew inglieh ingsaw ha ryngkat ka jingthmu ban dawa syndon, na u nongbiah pongrai, ïa ka bai mynrainkhmat. Uba kum uta un nym shat jingmut shaduh shata wei ba u tip shaikdar ba U Blei hi ruh um nym sngewtynnad ïa katta kaei-kaei. Un nym leh ïa kaei-kaei ruh kaba mar khongpong bad ka nongrim jong ka jingieit bad ka jingmapei ka jong U Blei.
U rangbah uba shisha um dei ban suitñiew ïa kaei kaei ruh kaba dei tang ka jingkawang ktieh, naba ka ktieh, ynda ka lah tyrkhong bha raw, ka ju hap hi noh. Kat nangïaid ki sngi ki por wat ka pyrthei hi ruh kan sa ithuh shai ba ka dei beit thik tang ka jingkawang ktieh. Uta u nongkawangktieh lane u nongbiah phongrai pat de ruh un nym shem ïa ka jingsuk mynsiem.
Ka long lehnohei pat ruh ban pynksan jubor ïa uba dalade u tip shaikdar ba u dei uba rem (guilty), kata, lada u dei uba dang don, hapoh jong u, ïa ka jingïatiplem (conscience). Ka long lehnohei ïa u, wei ba u hi u tip shai kdar ba u shu ksan beit thik tang hakhmat jong u parabriew, hynrei ym ha khmat jong U Blei. ñiuma, ka pyrthei, ka bym tip ïa ki jingshisha kaba sha lyndet, kan pynksan bad kan ïaroh ïa u hynrei ka jingïatiplem ka jong u pat de kan ïai tynruh ïa u, shoit shi shoit. Ka jingïatiplem ka jong u kan ïai pynrem ïa u, kan nym ai jingsuk ïa u. Da lei lei ruh em un nym ioh ïa ka jingsuk mynsiem kaba shisha. Un nym shem ruh ïa ka jingpalei jingmut jingpyrkhat.
