Beirut, Nailur:
Katkum ki khubor, la ong ba ka jingleit hiar thma jong ka Israel sha ka phang pdeng jong ka Syria ka la shim ia ka jingim jong 6 ngut ha ka janmiet jong ka Sngi U Blei kaba kynthup ia 3 ngut ki ‘riew paidbah.
Naduh ba sdang ka thma pohïing ha Syria ha u snem 2011, la ong ba ka Israel ka ju leit hiar thma da ki spah sien sha katei ka nongbah jong katei ka ri, khamtam eh ïa ki kynhun ba ju ai jingkyrshan ïa ka Iran.
Ka Syrian Observatory for Human Rights na Britain ka la pyntip ba ka jingdon jong kiba khlad ha katei ka jingleit hiar thma jong ka Israel sha ka thaiñ Masyaf la don kumba hynriew ngut. Napdeng kine, 3 ngut ki dei ki ‘riew paidbah, uwei u rangbah lem bad u khun jong u kiba don ha kawei ka kali bad 4 ngut pat ki dei shipai ki bym lah shuh ban ithuh.
Ha kane ka jingjia thombor, la ong ba ki la don ruh sa 15 ngut kiwei pat kiba la mynsaw bad ka la pynjot-pynjulor ruh ia ki jaka jong ki shipai ha katei ka thaiñ.
Ka jinghiar thma jong ka Israel ha Syria ka la jur bha naduh ka jinghiar thma jong ka Hamas ha Israel ha ka 7 tarik u Risaw kaba la wanrah ïa ka thma kaba jur hapoh Gaza Strip.
Ha kaba kut jong u Nailar ruh, 3 ngut ki nongialeh pyrshah ia ka Iran, ki la shah pyniap ha ka phang pdeng jong ka Homs, ha ki jingiakhih kiba la pynshong nong-rim haba iadei bad ka jingleit hiar thma Israel sha Gaza.
