Bertina Lyngdoh
Ka pule puthi ka dei ka jingioh bynta lem ka bym don jingkut ïa man u briew. Ka pule puthi ka plie lad ïa u ban kyrshan dalade ïalade bad ban roi ha ka jingnang jingtip.Ban nang kham roi ha ka jingnang jingtip donkam ruh ban nang kham pynïar ha ka kyrdan ka pule puthi. Ka pule puthi kaba la kham ïar ka pynlong ïa u ban suk ha ka kren ka khana, ban pule bad thoh, bad ban proh ha ka pyrkhat ka pyrdain. Baroh ngi kwah ban don bynta lem haka pule puthi, hynrei bunsien ka lad kam plie namar ka jinghiran ha ka ioh ka kot.
Wat diaw wat khuslai, haba ka lad ka plie kyrmen ba ka ioh ka kot ruh kan sa don la ka bynta ban long kum ka jingïarap. Ka jingioh bynta lem ha ka pule puthi, kam dei ban long ka jingeh ïano ïano ruh. Kumjuh ruh ka jingai bynta lem ha ka pule puthi kam dei ban long ka jingeh ïa kiba don ka bor ha ki jaka pule kiba kynthup ïaki skul, kolij, bad ki skulbah. Ka jingduna ha ka bor iohi, sngew, kren, bad ïaid, kim dei ban long ki jingeh ïaki jaka pule. Wat ai kiba kum kine ki daw jingkylli kin mih kum ka nuksa, kumno un pule bad thoh ha bym iohi, kumno un wan un leit ha bym lah ïaid, kumno un sngap ha bym iohsngew, bad kumno un ïa kren ïa khana ha bym lait kren. Kine ki dei tang ki daw ba ka imlang sahlang kam pat long kaba aibynta lem. Watla kine ki dei ki jingduna jong u, hynrei aibynta lem ïa u, ba un pyni ïa ka jinglah jong u. Ka jingai bynta lem ïa kum kine, ka ju wan rah barabor ïaki jingkylla ha ka rukom pyrkhat pyrdain ka imlang sahlang. Da ka jingdon bynta lem kiba kum kine, ka pynlong ïa kiwei ban trei shitom bad minot bad ban klet noh ïa ka jing bym lah jong ki. Ki lah ban long kiba pher ha ka imlang sahlang, hynrei ban poi sha ka thong, ki don la ka bor ka maïan.
Kumta, kito kiba don ïaka bor, kum ki nongpynïaid, ka jingkyrpad ka long ba ai bynta lem ïa kum kine, ban shim bynta lem ha ka pule puthi ryngkatlang bad kiwei. Ka jingpynbynta lem ïaki, ka mut ba phim peit ïa ka jingduna jong ki khamtam eh ha ki dkhotmet. Wat tieng wat riej ioh ba kim lah, hynrei kyrshan ïarap ïaki ba kin kiew lem ha ka pule puthi. Ai mynsiem ïaki, bad katla katïai, kyntiew lem ïaki ba kin poi sha ka thong.
