Guwahati, Nailur:
Ki la don saw ngut ki lehnoh ba shyrkhei kiba la shahkem ha Manipur bad Assam ha ki ar tylli ki jingkhynra ba la pyntreikam kyrpang, la ong uwei u heh pulit, ha kaba u la bynrap shuh shuh da kaba ong ba la lap ruh ïa shibun ki tiar siat ha ka por ba la pynlong ïa ka jingkhynra ha ka thain Shatei-lam-Mihngi jong ka Manipur kaba la shah ktah jur na ki jingdon jong ki jingïakynad.
Katkum ka jingïathuh ka tyllong khubor kaba la wan na ka tnat ïada ri, la ong ba ki shipai jong ka Assam Rifles, hadien ba ki la ïoh jingtip shaphang ka jingdon jong kine ki lehnoh ha ki bynta khappud ka India bad ka Myanmar, ki la pynlong ïa ka jingkhynra ha Tengnoupal district.
“Ki shipai ki la ïohi ïa ka jingïaid jong ki katto katne ngut ki briew hapoh khlaw. Ka kynhun pahara ka la kerkut khnang ban khanglad ïa ka jinglait phet jong kine ki lehnoh, ha kaba kane ka la pynlong ban ïohkem ïa lai ngut ki lehnoh ka kynhun PLA (People’s Liberation Army). Ïa kine ki lehnoh la aiti sha ki pulit jong ka Pallel ha Manipur na ka bynta ban pynlong shuh shuh ïa ka jingtohkit kaba bniah, ” la ong ka tyllong khubor.
Sa ha kawei pat ka khubor, kumba la ïoh jingtip, la ong ba ka kynhun Special Task Force, Assam, ka la pynlong ïa ka jingkhynra ha ka thaiñ Beltola kaba ha Guwahati, ha ka miet jong ka sngi Thohdieng bad ki la kem ïa uwei u briew uba dei u nong Manipur, ha kaba la lap ba u donkti ha ki ba bun ki kam pynjot pynpra.
U nongaiktien jong ki pulit ka Assam u la ïathuh ba une u briew uba la shah kem u dei uba la tip kyrteng kum u L.S.
U Yosef Chongloi (34 snem) u bashong-basah ha Churachandpur distrik, ha Manipur.
U Chongloi, u dei u Finance Secretary jong ka United Kuki National Army bad uba la shah suba ba u donkti ha ki kam pynjot pynpra kiba kynthup ïa ka Jylla Manipur bad ki jaka khappud jong ka Assam.
Utei u nongaiktien u la ong ba u la donkti ruh ha ka jingpynbthei bom ba dang shen ha kaba ka la pynjot pynpra ïa ka Sapermaina ha ka National Highway-2 bad ka jinghiar thma da ki tiar siat ïa ka kynhun jong ka Indian Oil Corporation ha Tamenglong ha Manipur.
Nalor kane, sa ha kawei pat ka khubor ba la ïohlum, ki shipai jong ka tnat Indian Army ha ryngkat ki shipai ka tnat Border Security Force, Central Reserve Police Force bad ki pulit jong ka Manipur ki la pynlong ïa ka jingleit khynra lang ha Maulsang bad Shejang ha Churachandpur distrik ha ki 48 kynta ba la leit bad ki la ïoh ban kurup ïa kiba bun ki tiar siat bad ki kuli ïasiat.
Ki tiar ïaleh bad ki kuli ba la ïoh ban kurup ki kynthup ïa kawei ka suloi 7.62 mm AK Series, kawei ka suloi M-16 kaba la pynkylladur bad pynitynnad bha, kawei ka suloi shna hi kaba heh, lai tylli ki Omprovised Mortar (pumpi) kiba heh, uwei u ‘namding ba la shna hi, bad kiwei pat ki tiar hiar thma.
