Srinagar, Nailur:
Katba ka ilekshon sha ka ïingdorbar thawaiï ha Jammu & Kashmir ka nang jan, ki seng saiñ pyrthei ki la nang pynjur ïa ka jingïalap ilekshon jong ki ha ka Union Territory.
Ha kaba ïadei bad kane, ha kine ki khyndiat sngi ba la leit, u nongïalam ka seng Congress, u Kanhaiya Kumar, ha ka jingleit ïalap ilekshon ha Anantnag, u la ong ba ïa mynta ka la don ka jingsngapjar ha Jammu & Kashmir bad ka jingsuk kaba shisha kan sa phai ynda ka seng jong u kan wan ha ka bor synshar.
Ha ka jingïakren bad ki nongthoh khubor ha ka por ba u la leit ïalap ilekshon, u Anantnag, u la ong, “Ka don ka jingïapher hapdeng ka jingsngap jar bad ka jingsuk. Ka don ka jingsngap jar hangne. Ngi hap ban wanrah ïa ka jingsuk kaba shisha”.
U Kumar, u ïalap ilekshon na ka bynta u General Secretary ka All India Congress Committee (AICC), u Ghulam Ahmad Mir, uba dei u kyrtong jong katei ka seng, u ban ïakhun ha kane ka ilekshon Assembly ha J&K Assembly na Dooru konstitwensi.
U la ong ba ka don “ka jingbitar shla pyrshah ïa ka jingshah lehbeiñ” kaba ki paidbah ka Union Territory ki la mad ha kine ki 10 snem ba la leit.
“Ka jingsngewthuh jong ngi ha kane ka kynti kaba mynta ka long ba ka jingthep vote ha Kashmir kan long kaba heh tam. Kane ka jingthep vote kan long pyrshah ïa ka jingshah lehbeiñ, ka jingkyrduh kam, ki jingleh bymhok ba la leh ïa ki paidbah jong ka Jammu & Kashmir, bad ban ïoh biang ïa ka hok jong ki ban ïoh jylla,” u la ong.
Une u nongïalam jong ka seng Congress u la siat ruh ïa ka sorkar kmie ba la ïalam da ka Bharatiya Janata Party (BJP) bad kynnoh ba ka don ïa ki “jingthmu bymman”. U la khot ïa ki kyrtong shimet ha ka ilekshon “ki mraw jong u Myntri ka sorkar kmir u Amit Shah.”
U Kumar u la ong ba ka ilekshon ka dei ka thma hapdeng ar tylli ki rukom pyrkhat, ha kawei ka liang ka National Conference-Congress bad ka jingïatreilang jong baroh kiwei pat, “kaba ha ka jingshisha ka dei ka jingïatreilang jong ka BJP,” ha kawei pat ka liang.
“Kane ka jingïaleh ka dei hapdeng ka jingïeid bad ka jingshun, hapdeng ka hok bad ka jingbymhok. Ka dei ka jingïaleh ban ai biang ïa ki paidbah ka Jammu bad Kashmir ïa ka hok jong ki, kaba la knieh noh na ki. Ki briew hangne ki la sngewthuh ba kim dei ban ailad ïa ka jingphiah vote, ” u la ong.
Ka ïingdorbar ha Jammu & Kashmir kaba don 90 ngut ki dkhot, kan sa pynlong ïa ka jingthep vote ha ki lai bynta, kata ka ban sdang ha ka 18 tarik, Nailur, 25 tarik, Nailur bad ka 1 tarik, Risaw bad ka jingñiew vote kan long ha ka 8 tarik, Risaw.
