Raphael Warjri
Ki sohmyntoi ki ba mih na jylla lane kiba shalan na shabar jylla ki ïaid lyngba jong ki sengkhaiï dkhar naduh mynno mynno bad mynta ki la sdang ban jyllei ha ïew ha hat lyngba ki heh saipan ne sengkhaiï Khasi. Lada shim nuksa ïa ki marbam mardih, ki mar ki mata ba donkam ha ïing ha sem ha ka imlang sahlang baroh naphang ki paidbah ki hap ban shaniah ha ki heh saipan ne sengkhaiï dkhar. Ki paidbah ki hap ban thied ïa ki marbam mardih, ki tiar ki tar, ki mar ki mata ba donkam ha ïing ha sem ne ha ka imlang sahlang na ki dukan dielang ne dukan khutia jong ki dkhar kham bunsien. Ki paidbah ki lah ban khñium ne bynñiaw ba rem dor ne kiew dor kita ki mar ki mata, ki tiar ki tar, hynrei ym don lad da kumwei ban ioh ha ka por ba donkam tyngeh ha ïing ha sem ha ka imlang sahlang. Kata ka long namar ba ki heh saipan bad seng khaiï ki bat lakam ïa ka khaiï pateng ka die ka thied ba ki paidbah kim lah ban kiar bad ki hap ban thied ïa la ki mar ki mata ki tiar ki tar ba donkam. Ban kham peiphang shuh shuh ha kane ka bynta donkam ban phaidien sha ka jinglong jong ki briew ha ka imlang sahlang kiba ym sngewthuh ïa la ka dor bashisha jong ki sohmyntoi ba ki wanlam ha ïew ha hat. Ka dei ka kpait saiñkam jong ki heh saipan bad ki seng khaiï ban iuhroit ïa ki nongkhaiï barit baria, kynthup ïa ki nongrep namar ba ka marbam ka dei kawei na ki sohmyntoi jong ka imlang sahlang ka ba donkam ki paidbah salonsar. Ki nong-rep kim dei ki nongkhaiï, kumta kim sngewthuh ïa ka ïew bad ka kam khaii kumba lah ban pynïaid ki heh saipan bad seng khaiï.
Ki nongkhaiï barit baria ki shah pyndonkam bakla ha ki heh saipan bad seng khaiï ban khñiot ïa ki nongrep. Ki nongrep ki shu kylla langkñia kat sha ba phai, namar ba ym don kano kano ka shlem khaii ka ban kdup ïa ki ha kawei ka thup bad marwei marwei ki shah pynshad shrieh ha ki nongkhaiï, katba ka nong bakhraw la kit da ki heh saipan bad ki seng khaiï. Kaba kham isaitmet ka long ba la jyllei ki ksiang khaïi (middlemen) ki ba bam armaloi na ki nongrep bad na ki sengkhaiï khlem da kheng baiseng (investment). Ki nongrep ki dei ki riewtbit ba trei minot ban kyrsoi ki sohmyntoi bad ki seng khaïi ki dei ki riewtbit ïa ka ïew ka hat ban korbar ïa ka siew ka pet. Ki nongrep ki dei kiba tip ïa ka mariang kaba kdew ïa ki aïom ban bet symbai, ban thung ban tep, ban sara kara, ban pynkhreh na ka bynta ka aïom seisoh seisyntiew (harvest) haduh ban da lum da kynshew ha u sup u thiar na ka bynta ban shalan ne ban die ha ki paidbah. Ki seng khaïi ne ki nongkhaïi ki dei ki riewtbit kiba tip ïa ka ïew ka hat, ïa ka jingdonkam bad jingdawa ki paidbah bad ki tipthuh ïa ka san ka mer jong ka khaïi pateng na ka bynta ban siewspah ïa ka imlang shalang. Ki nongrep ki don la ka jingtbit ban trei ha lyngkha naduh ba bet haduh ba seisoh na ka bynta ban thikna ki sohmyntoi ba donkam na ka bynta ki paidbah. Ha kajuh ka rukom ki seng khaïi ki don ka jing-tbit ban kheiñ ban diah na ka bynta ka jingdonkam jong ki paidbah da ki sohmyntoi kiba kynsai bad ki buh jingkheiñ katkum ka jingdonkam jong ki paidbah ha ryngkat ka ba kheng baiseng na ka bynta ban ïaineh ka khaïi pateng.
Hapdeng kine kiei kiei la mih pynban hapdeng da ki ksiang khaïi kiba khlem donkam ban kheng baiseng na ka bynta ka kam kaba ki trei ban kamai kajih bad khlem donkam ka jingtbit ban bet ban thung, ban seisoh seisymbai, ban ot ban kheit ynda la ih la ïaw bad ka poi ka aïom seisoh seisyntiew. Kane ka long kaei kaei kaba sngew bynñiaw ba pangnud ban shem ba ki briew kiba per ka jingtip ïa kano kano ka phang kaba dei ïa ka thung ka tep, ka rep ka riang bad ïa ka khaiï pateng, hynrei ki kylla long pynban kiba ioh myntoi palat liam ban ïa ki nongrep ne ïa ki nongkhaiï.
Ka dei ka kamram kaba kongsan na ika bynta ki nongrep ba kin tip ïa la ka jing-tbit ha ka thung ka tep ka rep ka riang haduh ban da dei ka aiom ban seisoh seisyntiew. Nalor kata ki don la ka hok ban die la ki sohmyntoi ha ïew ha hat kat ka dor ka ba biang na ka bynta ban ïahap katkum kaei kaei kaba ki la seibor ban biang ka thung ka tep, ka rep ka riang haduh ban da seisoh seisyntiew haduh yn da la biang artat ka siew ka pet ïa la ki sohmyntoi. Ha ka juh ka rukom ki nongkhaiï bad ki sengkhaiï ki don la ka bhah ban synñiang ola ka jingtbit ha ka ïew ka hat ban don ka die ka thied da ki mar kiba kynsai na ka bynta ba ki paidbah kin ioh da ki sohmyntoi kiba hun jrut. Kumta ka rukom wan mushlia jong ki ksiang khaiï ka pynswai ïa baroh artylli ki kynhun ha kajuh ka thong na ka bynta ka imlang sahlang.
