U Nongsaiñ Hima, 1985
Ki khlaw ki btap ki don ka bynta kaba kongsan ban bat bad pynneh ïa ka jinglong bajai jai bad ka jingïaid beit ïaid ryntih jong ka mariang. Ki dieng ki siej ki long kiba donkam na ka bynta ka bam ka sa bad kumjuh ruh na ka bynta ka shet ka tiew ha ïing ha sem. Khlem ki dieng ki siej ngim lah ban im. Dei ma ki, kiba ïarap ban pynmih bad pyndap ïa ka lyer ba ngi ring bad pynhiar mynsiem. Dei ma ki ruh kiba ïarap ban pynsngem ïa ka khyndew bad ai um ïa ki wah bad ki pung na kiba ngi ring um sha ki lyngkha ki risai bad ki pynthor ki hali.
Ka long, da shisha, kaba sngewsih ban tip ba ha ki jaka lum, kum ka Meghalaya, ki khlaw ki btap ki la stang iar iar bad ki nang duna duna. Ka jingpom pathar ïa ki dieng ki siej ka long ka daw ba ki lum ha ka Jylla ki synlen. Hynrei ka long pat kaba pynkmen ban tip bad iohi ba ka Sorkar Meghalaya ka sngewkhia shibun shaphang kane. Ban pynjyrngam pat ïa ki lum ki wah ba la synlen ka Sorkar kala thaw ban pyntreikam ïa ka skim kiba kyrpang na ka bynta ban thung dieng thung siej.
Ha kane ka liang, ka Sorkar Meghalaya lyngba ka prokram kyntiew ri ba 20 mat ka la lah ban thung haduh 81.70 lak tynrai dieng ha ka snem 1982 – 83 bad 68.25 lak tynrai pat ha ka snem 1983 84. Ha ka snem 1984-85 ka Sorkar ka la buh ka thong ban thung haduh 100 lak tynrai ki deing.Hynrei da ka jingkitkhia bad jingtrei shitom haduh 102 lak tynrai ki dieng la lah ban thung ha katei ka snem. Ka jingim jong ki dieng ba la thung ka long haduh 94 na ka 100. ïa ka Prokram pynman khlaw hangne ha Meghalaya, la sdang naduh ka snem 1979. Hapoh kane ka prokram kumba 8,000 hektar ki jaka basynlen bad basep ei, la lah ban pynlong ïa ki, ki jaka ba larkam.ïa kine ki jaka la ïada bad sumar sukher bha ïa ki. Ki dieng ïa kiba la thung ha kine ki jaka ki long kiba la jied katkum ka jingïadei jong ka khyndew. Khamtam na ki dieng ba la thung ki long kiba lah ban ai jingmyntoi ïa u khunbynriew, kum ha kaba shna ïing shna sem bad ki diengsoh diengpai babun jaid.
Ka Meghalaya ka long ka Jylla kaba ïapher bad bakyrpang haba ianujor bad kiwei pat ki Jylla hapoh ka ri. Ha Meghalaya, ki khlaw kiba hap hapoh ka jingpeit bad jingpynïaid jong ka Sorkar ki long tang 10 bynta na ka 100 jong ka jingdon ki khlaw baroh 90 na ka 100 pat ki hap hapoh ka jingpynïaid bad jingkhmih jong ka District Council. Hangne ha Meghalaya, ka khyndew ka shyiap ka dei ka jong u paidbah. Ka Sorkar, lyngba ka tnat treikam jong ka Forest Department, ka ïarap ïa u paidbah ha kaba thung dieng bad sumar sukher ïa ki haduh shiphew snem kynthih hadien kata ka aiti pat ïa kita ki dieng ba la thung ha ki paidbah. ïa kane ka program ne skim la tip ïa ka kum ka Social Forestry.
Ka Sorkar Jylla, lyngba ka Forest Department, ka la thaw bad pyntreikam ruh ïa kawei ka skim ba la tip kum ka “Ecological Restoration of Cherrapunjee.” Ka Sohra bad ki thaiñ sawdong jong ka, ka long kaba syllen bad batyrkhong. Lyngba kane ka skim ka sorkar ka la shim haduh 306 hektar ka jaka bad ki dieng ba la thung ki long haduh 12 lak tynrai. Hapoh kane ka skim, la lah ruh ban thung haduh 50,000 tynrai ki dieng ha baroh arliang ka surok Shillong – Sohra ha ka lynter kaba kumba 20 Kms. ïa kane ka skim ba la bei pisa tyngka da ka Ministry of Environment & Forest jong ka Sorkar Kmie.
Ka jingthung dieng thung siej na ka bynta u paidbah ka la par bad saphriang ha baroh ki district bad sob dibishon hapoha ka Jylla. Naduh ki khynnah bad samla shongskul, ki nonghikai, ki seng bhalang bad ki synjuk bapher bapher kiba trei na ka bynta ka ‘kor ka – mon ïa ka jingpyrta ne jingkhot – “Uwei u dieng ïa man la u khynnah.”
