U Nongsaiñ Hima,1966
Ka long kaei kaba pynsngewbha ïa ka ri, ban iohi ïa ka jingkiew shaphrang bad jingphriang ka pule ka thoh bad ka jingnang jingstad ha kane ka dong Ri Khasi – Jaintia jong-ngi. Ka jingroi jong ki skul pule, ka jingbun jong ki samla shong skul ka ïathuh hi ba don ka jingkyrmen kaba khraw ïa ka lawei ba kan long ka juk kaba kham shai bad kham shemphang. Ha kane ka liang la sngewdei ban ai jingïaroh ïa kito kiba don bynta bad ai jingmut ïa ka ban pynryntih ïa ka kyrdan pule ia ki skul kiba hap hapoh ka jingpynïaid jong ka United Khasi – Jaiñtia Hills District Council. Ngi kyrmen kumta ba kane ka jingpyrshang kan nym pulom, hynrei ba kan long kum u mawjam sha ka jingpyntylli bad jingpynryntih ïa ki jingpule jong ki kyrdan kiba kham halor. Wat la ka thaiñ Jowai sub – division kaba la lait noh mynta na ka jingpynïaid jong kane ka District Council, la kyrmen ba ka jingpynïaidkam hangto kaba ïadei bad kane ka kam kan pyntreikam ha ujuh u ksai kumba la leh hangne, khnang ba kane ka jingïaryntih kan long kaba salonsar ha baroh kawei ka ri. Ngi kyrmen ruh ba kata ka jingangnud bad jingthmu ban pynlong ïa ka University ha Shillong kan urlong kloi.Da ka jingdon jong kane ka University la khmih lynti ba ïa ka pule ka thoh, khamtam ha kane ka ri Khasi – Jaintia yn nang lah ban nang pynphriang ïa ka ha ka rukom kaba beit ka ban pynmyntoi bad ïarap ïa ki samla shongskul jongngi.
Ka jingnang jingstad kam mut tang ban ioh rung ha ki kam shong shuki ha ki office ha sor, hynrei ka long ka lad kaba khraw khamtam ia ki khun jong ki nongrep jongngi ban wad jingtip shuh shuh shaphang ka rep ka riang, ha kaba kin lah ban leitphai pat sha la ki lyngkha ki risa, bad da ka jingpyndonkam ïa ka jingstad kaba ki la ioh, kumta ka rep kan nang seisoh bad kane kan long ka jingkyrkhu ïa ka jaidbynriew lada ngi la lah ban bsa dalade ïalade khlem da ap bam shuh na kiwei. Ym tang ha ka rep hynrei kumjuh ruh ha bun pat kiwei kiwei ki liang, ka don ka jingkyrmen ba ka lawei kan im, tang lada ngin nym pyndonkam bakla ïa kane ka lad ba ka jingnang jingstad ka ai.
