U Nongsaiñ Hima,1980
Katba ngi dang long briew ngi donkam ïa ka bam namar ba ka tei bad ai jingkhlaiñ ïa ka met jong ngi ba ngin lah ban phikir ïa ki kam jong ngi kiba man la ka sngi. Ngim lah ban im khlem da bam. Ka pyrthei kan jin da la suk, kan ym khih ym ksar haduh katne lada ngi la long kum ka ñiangkongwieng kaba im tang da ka lyer kaba khuid. La thaw ïa ngi da u Nongthaw ha kaba U la buh ïaka kpoh kaba khwan bam man la ki lai bad saw kynta. Kumta ka bam ka long kaba donkam eh na bynta u khun bynriew satlak ka pyrthei.
U Khun Khasi Khun Khara un hap wad ki lad ki lynti namar ka jaka ka bun kyrhai ha ka ri ban rep ban riang ban pyndap bam ïalade bad ïa la ka Ri lajong. Bun na ngi ki khein sting ïa ka rep bad ki sngew don burom shibun eh ba tang shu lait Class IX ne Class X ban shong ha ki shuki ha opis bad ïa ki type ban type ban ioh pisa. Kane ka jingpeit bad jingthrang ka long kaba dei ban pynduh shisyndon namar ka Ri kan ym lah ban roi ne jam sha khmat tang ha kito kiba trei ophis. Donkam ki nongrep bad kumba la ju thoh ha kane ka kot khubor, ïa kawei ka jingkren bastad jong uwei u riewstad ba u briew uba lah ban pynmih wat tang shi synjop u kba u kham kordor ban ïa ki 10 ngut ki nongsaiñ hima (politician).
Lada ma ngi ngim trei shitom ngin lah ban long kiba lah ban ïeng ha la ki kjat ha ka liang ka bam. Ban long ki nongkhrong ha ka liang ka bam kan long kaei kaei ka jingtim kaba kane ka Ri jong ngi kan hap ban mad. To ngin ïa panpoh ïa la ki syngkai ban pynmih ïa ka bam la jong bad kordit ïa ngi lada ngi dei ban hap ban khrong ïa ka bam na kiwei.
Ka jingïaid shaphrang ki Ri West Germany bad Japan ka long kaba la pynphylla ïa kiwei pat ki ri. Hadien ka jingshah pynjot ha ka Thma Bah kaba Ar haduh ba la duh jingkyrmen ba kitei ki Ri kin lah ban khie khlieh hynrei pynba ki la ïaid shaphrang bad lah ban ïaryngkat bad kiwei ki Ri jong ka Pyrthei.
Lah ban ong ba kawei na ki daw ka long ka jingïalam barangbah bad ba khlem kwah ioh jingmyntoi shimet da kito kiba long ki nongïalam hynrei kiba peit ïa ka bhalang jong u paid knup paid trap. Ki peit ïa kip hang baroh bad ki pynleit ïa la ki jingmut sha ka jingshakri bahok bad ba-sngur ban kyntiew ïa la ka Ri bad ki briew kiba shong ha ka.
Kawei pat ka daw lah ban kdew ba ki briew jong kitei ki Ri ki long kiba smat kiba sting bad shim kabu ïa ki lad ba la plie da ki nongïalam bad la pynshlur ruh ïa ki briew. Ki la shim bad ki la pyntrei kam hok ïa ki bad kumta mih soh uba kyrhai ban pynriewspah ïa ka Ri bad ïa ki briew jong ka. La ong ruh ba ki briew ha kitei ki Ri kim pynlehnohei wat tang shi sapit ka khyndew. Ki thung ki tep, ha ki jaka kiba long ban leh kumta, ha ki jaka maw ki wad ki lad kumno ban pynlong jaka rep ba uno u jynthung uba lah ban long kat kum ka jinglong ka khyndew ban pynmih ïa ka spah ka phew na ka khyndew.
Na ka liang ki karkhana la ong bay m don ki karkhana kiba ki samla jong kita ki Ri kim shym la pyntbit ïalade.
Haba kumta don jingartatien ei ei ba kum kata ka jaidbynriew bad kum kata ka Ri kan sadien bad kan kylla duk?
