Beijing, Nailur:
Ka China ha kane ka kynti ka la pynbna paidbah ha ka sien ba nyngkong eh halor ka jinglah jong ka ban pynher da kaba jop ia u ‘namding ba kyrpang jong ka, u ‘Intercontinental Ballistic Missile’ uba la pynher sha ka duriaw bah Pacific ha ka Sngi Balang. Kane ka jingleh jong ka China ka la wanrah ia ka jingsngewkhia na ki ri ka pyrthei halor ka jingpyrshang pynher ‘namding nuclear jong katei ka ri.
Ia utei u ‘namding ICBM ba khlaiñ bor, la pynher da ki shipai ka China ha ka por 08:44 baje mynstep jong ka Sngi Balang bad u la leit hap sha ki bynta jong katei ka duriaw hi kumba la thmu da ki shipai China ban ioh pynbthei ia u bad kam shym don ruh kano- kano ka jingktah ia ki paidbah ne ri ba marjan.
Ha kajuh ruh ka por na ka liang ka tnat ïada jong ka China, ka la pynpaw ka jingsngew men kaba khraw ba katei ka jingpyrshang pynher ‘namding ka la long kaba seisoh bad ka la ong ruh ba ka China ka donkam ban pynkhreh bad ban pynkhlaiñ ialade khamtam ha kum kine ki sngi ba kat shaba phai ki ap tang da ki thma suda.
Pynban na ka liang katto-katne ki nongpeit bniah ki kynthoh ba ka jingstet jong ka jingpynmih nuclear jong ka China ka la palat ia ki kyndon ba la buh ia ki ri jong ka pyrthei hynrei ka China ka la ong ba ka la dep bud ryntih ia ki kyndon ba la buh, tangba ka long namar ba kam pat pyntreikam ne pyrshang pynher ia une u ‘namding baroh shi katta bad ka la ong ba une u ‘namding um dei uba ka shna thymmai ha kane ka por.
Hynrei la ong ba dei tang ka North Korea kaba ju pynher ‘namding na ka por sha ka por bad kaba la wanrah ia ka jingsngewkhia bad ka jingmaham na ki ri ba marjan khamtam ka United States bad ka South Korea kaba la ju kren bha halor ka jingpynher ‘namding ba khah-khah jong ka NK.
