Shillong, Nailur 25
U Myntri Rangbah ka Jylla, u Conrad K Sangma, ha ka Sngi Balang u la ong ba ïa ka rai ban ai jingbit ne em ban pynlong ïa kino-kino ki rally ne ki ‘yatra’ ka shong ha ka bor jong ki Deputy Commissioner (DC) ym ha ka kyrdan jong u Myntri Rangbah.
U Conrad u la ong ïa kane, haba jubab ïa ka jingkylli halor ka jingpyrshah ïa ka ‘rally’ jong ki shit niam Hindu halor ban pynbna ïa ka masi kum ka kmie jong ka Ri India bad khang bam doh masi ba la thmu ban pynlong ha nongbah Shillong.
“Wat kum ka NPP haba ngi kwah ban pynlong ïa kino-kino ki rally, ngi hap ban thoh bad pan jingbit na ki DC bad don hateng-hateng ba kim ai jingbit wat ïa ka rally ne jingïaid paidbah ba thmu ban pynlong da ka NPP,” la ong u Conrad.
“Namar kata, kane ka rai ka shong eh ha ki bor pynïaid District, kam dei ha ka kyrdan u Myntri Rangbah, wat lada u Myntri Rangbah u kwah ban pynlong rally na ka bynta ka seng saiñ pyrthei lajong, ngam shym la ïoh jingbit hateng-hateng na ki DC,” u la ong ïa kane haba pynkynmaw ïa u Commissioner & Secretary u Sanjay Goyal, ha ka por ba u long SDO ka Ampati, uba khlem ailad ïa ka seng ban pynlong rally ha u 2008.
Haba pynpaw ba kam don satia kano-kano ka jingmushlia jong ka Sorkar halor kane, u Conrad u la ong, “Ngi long shai bha ïa kane. Ki jingbit ki dei kiba ai da ki kyrdan Deputy Commissioner bad ka shong ha ki DC ban rai la kin ai ne em haba pynshong nongrim ïa ki jinglong jingman bad kiwei kiwei ki kam”.
Haba kylli, u Myntri Rangbah u la ong ba ka jingkylli kam mih satia ha ka ban khang ïano-ïano ban leh eiei ha ka rukom ïabam ïadih bad ïa ki kam ba ki jied namar ka India ka dei ka Ri kaba laitluid.
