Shillong, Nailur 08
U Myntri Rangbah ka Jylla u Conrad K. Sangma u la pynkup burom da ka khusnam ‘Achiever of the Month’ sha ka khlur ïalehkai phutbol ba paw ka Jylla, ka Sanfida Nongrum.
Haba kren ha kane ka sngi halor ka jingthmu jong ka jingai khusnam ‘Achiever of the Month’, u Conrad u la ong ba ka long kaba donkam ban ithuh ïa ka jingjop jong uwei pa uwei ha ki jingïalehkai bapher bapher, ban kyrshan, ban ai mynsiem bad ban burom ïa ka jingtrei shitom jong ki. U la ong ba ka jingïalehkai sports ka dei ka bynta ba kongsan bha bad na ka liang ka Sorkar ka la leh ïa kaba bynta kaba kyrpang da kaba pynlut ïa ka mang pisa kyrpang jong ka bynta ban kyntiew ïa ki.
U Myntri Rangbah u la pynkynmaw biang ïa ka jingangnud ka Sorkar na ka bynta ban kyntiew ïa ki samla ka Jylla da kaba ong manla ka prokram, manla ka pisa ba la pynlut kam dei ka jingpynlut, hynrei ka dei ka jingbei pisa na ka bynta ka lawei jong ki samla.
U Conrad u la ai jingïaroh ïa katei ka khlur ïalehkai kaba la trei shitom, te kumta ka long kaba dei hok ban ïoh ïa ki khusnam namar dei lyngba ki kam ïalehkai kaba long ka lynti jong ka jingim bad kane ka jingïaid lynti kan ym kut tang hangne, hynrei u la pynshlur ba ka dei ban long ka nuksa ruh ïa kiwei.
U Conrad u la ïoh ruh ban ïakren bad kiwei pat ki nongïalehkai, ki coach ha kane katei ka prokram. Kumjuh u Myntri Rangbah u la jubab ruh ïa ki jingkylli bad ki jingai jingmut halor kumno ban kyrshan ïa ki nongïalehkai ba kin ïoh ban shim bynta ha ki jingïakop hapoh ka ri bad shabar ri ruh kumjuh.
La ïoh ruh ban pynkup burom ïa ki 46 ngut kiwei pat ki nongïalehkai ka Jylla na ka bynta ki jingjop bapher bapher jong ki.
