New Delhi, Nailur:
Uwei u shipai ka tnat Border Security Force (BSF) u la shah set da kumba 6 kynta hadien ba ki la don kumba 15-20 ngut ki nong Bangladesh kiba la rahbor bad aiti ïa u sha ki Border Guards Bangladesh (BGB), ha kaba kane ka la pynlong ïa ki bor ba dei khmih jong ka ri India ba kin pyrshah jur ha ka Sngi Ba-ar.
Ha ka jingthoh ba la phah, ka kynhun BSF ka la ong ba u North Bengal Frontier Inspector General (IG) u la ïakren bad u heh shipai jong ka Bangladesh ha kaba la dawa ban phah pyllait noh ïa une u shipai. Une u shipai u la shah pyllait ha ka por 5 baje janmiet jong ka Sngi Ba-ar, hadien ba ka la don ka jingïakynduh bad ki heh shipai jong ka tnat BGB.
Katkum ka khubor ba la pyllait da ka Bangladesh la ong ba ki heh jong ka BGB, ki la pynshisha ba une u shipai u la leit ban ïaid lyngba ka bynta khappud ha kaba u la shahkem noh.
Ki shipai BSF ki la kyntait halor kane bad ong ba kane ka jingjia ka long shi bynta ka jingbym shngaiñ ha khappud bad kaba pynkyndit bynriew.”
“Ha kaba ïadei bad ka jingsngewkhia halor ka jingbym don jingshngaiñ ha ki bynta khappud, u shipai BSF u la shah rahbor noh ha ka por ba u dang don ha ka kam kumba ju leh na ka bynta ban pynlong ïa ka jingpahara hajan khappud Biral ha Dinajpur, India. Kane ka jingjia ka dei kaba la donkti da ka kynhun jong ki 15 haduh 20 ngut ki runar kiba dei ki nong Bangladesh kiba la ïaid lyngba ki bynta jong ka ri India bad da ka bor ki la rah ïa une u shipai sha Bangladesh bad u la shah set ha ki shipai jong ka BGB,” la ong ka jingthoh ba la wan na ka tnat shipai BSF.
“Kum ka jubab ha kaba ïadei bad kane ka jingjia, ka la pynlong ïa u IG jong ki shipai BSF North Bengal ban leit ïakynduh ïa u Region Commander jong ka North West Region, BGB, ha kaba la dawa ba la dei ban pyllait noh mardor ïa u shipai uba la shah rahbor…ïa une u shipai la pynphai da ki shipai BGB hadien ka jingïakynduh jong ki heh shipai.
Ka jingthoh kaba la wan na ki shipai BSF ka la bynrap shuh shuh da kaba ong ba ki shipai kane ka ri kim shym la pynibor da ka jingsiat hynrei ki la kyrpad ïa ka jingïatreilang jong ki BGB khnang ban pynneh ïa ka jingïaid beit ka synshar-khadar.
