New Delhi, Naitung:
U heh nongïalam jong ka seng AAP, u Arvind Kejriwal, ha ka sngi Ba-ar, u la pynpaw ïa ka jingkyrshan jong ka seng jong u, ïa ka jingïakhih kaba dang ïaid jong ka seng Cockroach Janta Party (CJP) ha Jantar Mantar ha Delhi, bad u la kyntu ïa u nong ïakhih halor ka mariang, u Sonam Wangchuk, ba un pynkut noh ïa ka jingshah thngan ba khlem buh sngi jong u.
Ha ka jingïalang bad ki nongthoh khubor, u Kejriwal u la ong ba un leit sha Jantar Mantar ha ka por 5 baje mynstep jong ka sngi Palei ban pynsngew ïa ka jingkyrshan jong u ïa u Wangchuk bad ïa ka jingïakhih jong ka CJP.
“U Sonam Wangchuk u la shah thngan la katto katne sngi bad ka koit ka khiah jong u ka nang sniew. U dei ka jingmyntoi jong ka ri bad nga kyrpad ïa u ban pynkut noh ïa ka jingshah thngan jong u. Ki don kiwei pat ki lad ruh na ka bynta ka jingïaleh,” la ong u Myntri Rangbah barim ka Delhi.
Ka AAP ka kyrshan ïa ka jingïakhih jong ka CJP bad ki jingdawa jong ka bad u Myntri ka tnad pule puthi ka sorkar pdeng u Dharmendra Pradhan u dei ban hiar shuki mardor, u la ong.
U Kejriwal u la bynrap ba dei ban pynbha ïa ka rukom thoh eksamin khnang ban khanglad ïa ki jinglaittuh ki jingkylli bad ban ïada ïa ki samla pule na ki jingeh ha ki por ban wan. Ka nongïalam ka AAP bad ka Myntri Rangbah barim ka Delhi ka Atishi ka la ïakynduh ïa u Wangchuk ha Jantar Mantar ha ka lah sngi U Blei.
Ka CJP ka la pynlong ïa ka jingïakhih ha Jantar Mantar ban dawa ïa u Pradhan ba un hiar shuki noh halor ka jingkynnoh ba u don bynta ha ka jingbym lah ban pynïaid beit ïa ka eksam NEET bad kiwei kiwei ki eksamin. U Wangchuk u la ïasoh bad ka jingïakhih ha ka 28 tarik, Jylliew bad u la shah jingit khlem buh por naduh katei ka por.
