Bhubaneswar, Naitung:
Da ka jingdon bun ki nongpang Covid-19 bad arngut kiba suba ba ki la ïap ha ki jylla ba marjan jong ka Andhra Pradesh ha kine ki taïew ba la dep, ka sorkar Odisha ka la ïaid shakhmat, da kaba pynkhlaiñ ïa ki lad jingïada bad ki lad pynkhreh ban ïada na ka jingsaphriang jong ka jingpang ha kane ka jylla.
U Director jong ka tnad ka koit ka khiah jong ka jylla, u Rabindranath Mishra, u la ïathuh ha ka lad phah khubor ba la pynim biang ïa ki rukom sumar bad la pynjur ïa ki test ban lap ïa ki jingpang. Hynrei u la kyntu ïa ki briew ba kim dei ban tieng namar ba ym pat lap ïa kiba ïoh ïa ka jingpang ne long positive ïa mynta.
“Ka jingpeitngor jong ngi pyrshah ïa ka jingpang Covid-19 ka dang ïai bteng bad ïa ki test la pynlong ha ki jaka bapher bapher man ka por. Ka result haduh mynta ka dang sah negative.Ym don eiei ban khuslai bad ngi long kiba husiar man ka por”, la ong u Mishra.
Arngut ki briew, kynthup ïa uwei u rangbah ba 46 snem ka rta, la suba ba ki la khlad noh na ka jingpang Covid-19 ha ka District Kadapa jong ka Andhra Pradesh dang shen, katba kumba shiteng phew ngut kiwei pat ki nongpang Covid ruh la lap ha katei ka thaiñ.
Ki nongpang Covid kiba dang thymmai ki la pynlong ïa ki bor pynïaid ka koit ka khiah jong ka jylla ba marjan ban pynjur ïa ka jingpeitngor, ban phah ïa ki kynhun ai jingïarap kaba kham kloi bad ban lum ïa ki nongmuna na ki briew ha ki jaka ba shah ktah.
La ïathuh ba la bthah ruh ïa ki hospital ha ka jylla ba kin pynkhreh ïa ki jaka sumar kum ka jingïada.
Ka sorkar pdeng ka la kyrpad ïa ka sorkar Odisha ban pynjur ha ka ban leh test bad ki lad jingïada na ka bynta u Covid, hadien ba la ïoh jingtip ïa ka jingkiew thymmai jong ki nongpang ha u bnai Jylliew, 2025.
