Kohima, Nailur:
Ka Drug Disposal Committee hapoh ka jingpynïaid jong u Inspector General of Police (CID), jong ka PHQ Kohima, ka la pynlong ïa ka jingleit khynra halor ka jingthmu ban pynjot bad pynduh pyndam ïa ki jingdih pynbuaid kiba la ïoh kurup da ka Narcotics Cell ha PS PHQ ha ka 26 tarik Nailur.
Kane ka jingpyntreikam ka la long ha ka jaka bret jaboh jong ka Kohima Municipal Council (KMC) kaba don ha Meriema, Kohima. Katkum ka jingtip ba bniah halor ki tiar ba la ïoh kurup hapdeng u snem 2022-2023, la ong ba ki kynthup ïa u drok, Heroin kiba don ha ki 500 tylli ki sop sabon kiba don ha ka jingkhia kaba 5 kilo-729.68 gm.
U drok ba la thep ha ki 44 tylli ki song, uba don ka jingkhia ba 41 Kg 030 gm 94 mg. Ki dawai Yaba ha ki 25 tylli ki song ha kaba baroh ki la don 2,49,400 tylli. La antad ba ka dor jong kine ki drok ba la ïoh kurup ka long palat ïa ka `. 44.53 klur. Ki heh pulit kiba la don bynta ha kane ka jingïakhun pyrshah ïa u drok ki kynthup ïa u Dr. K.P.A Ilyas, IPS – DIG (CID), Shinde Suresh Kailashrao, IPS – SP (Narcotic), Dr. Mhalo, NPS – SP (Crime) bad Joy Zeliang – Dy. SP (Crime) ryngkat ka jingdonlang ki nongmihkhmat na ka District Court, ka Kohima Municipal Council, ka Kripa Foundation, bad kiwei kiwei ki heh ba dei khmih.Kane ka jingleh ka long shi bynta jong ki jingpyrshang ban ïaid shakhmat ha ka ban ïakhun pyrshah ïa ka jingkhaïi drok bad ban pynthikna ha ka ban ai jingshngaiñ ïa ki paidbah.
