U Nongsaiñ Hima, 1966
Ka Spah ka ri ka shong ha ka jingpynmih ïa u symbai na ka khyndew bad ha ka jingpynwan dur ïa kita ki jingmih kiba na ka khyndew.
Kaba nyngkong ka ktah ïa ka Rep ka Riang bad kaba ar ka ktah ïa ka jingshna bad jingthaw ïa ki Tiar ki Tar (Industry).
Ka jingwan jong u Tarlok Singh sha kine ki ri lum Mihngi da lade hi ban peit ban jngoh bad uba long ruh uwei na ki Dkhot jong ka Planning Commission kaba donbor shibun eh ha ka ri, ka long kaei kaei kaba don jingmut shibun.
Ngim tip ha kano ka liang kan long ka jingthmu jong u. Hynrei lah ban ong ba ka jingthmu kaba kongsan shuwa ka long na ka bynta ka Rep ka Riang. Ngi don katne ki jaka ki puta kiba ngi lah ban pyndonkam, hynrei bun na ngi ngim tip kumno ba ngin pyndonkam ia ki namar ka jingïalam na ka liang ka sorkar ka duna shibun. Dei ban don ki riewstad ka Rep na ki ri Japan ne na Wales ne na Scotland namar ki jaka jong ki ki ïa syriem eh shibun ïa kine ki ri lum jong ngi. Ngi dei ban ioh lad ban tip bad nang na ki kumno ki thung bad uno u jingthung uba lah ban wan lam pisa kham bun.
Khlem pep u Sri Tarlok Singh un hap ban pynleit jingmut shibun ia kane ka jingtyrwa.
Wei haba la lap ïa ki kynja jingthung jingtep ki ban ïadei bad kine ki ri lum donkam ruh ka Iew. Ka sorkar ka dei ban long ka nongthied khnang ban lait na ka jingban beiñ ïa ka dor da ki mahajon.
Ka jingthung jingtep ruh ka dei ban long ha ka rukom kaba ryntih, ym kum ba ka long mynta shu buh namar ba rem phan mynta u snem, baroh ha uwei pat u snem ki ïathung phan lut. Kane ka jingleh ka pynhiar dor shibun ïa u phan. Kumta na kane ka liang, ka jingthung ia uno uno u symbai ka dei ban long katkum ki jaka bad kum ka jingdawa ka ri kaba ka sorkar ka dei ban kit khia.
Na ka liang ka karkhana shna tiar ka long kaba sngewsynei ïa ngi ki ri lum namar tang kawei ruh ngim don. Kine ki ri lum jong ngi imat ka sorkar ka mut tang ban pynlong ïa ki karkhana pynmih electric na ka bynta ka jingmyntoi kiwei pat ki dong jong ka ri ym na ka bynta ka jingmyntoi jong ngi ki paid ri lum. La sngewdei ba u Sri Tarlok Sngh un pyrkhat khyndiat ïa kine kiei kiei lada ka jingwan jong u sha kine ki ri lum jong ngi kan long kaba seisoh.
