Kohima, Nailur:
Ka Naga Students’ Federation (NSF) ka la pynpaw ïa ka jingpyrshah kaba jur ïa ka jingpynjlan kaba dang shen jong ka Armed Forces (Special Powers) Act, 1958 (AFSPA) ha ki 8 tylli ki distrik jong ka Nagaland, kumba la pyntip da ka Ministry of Home Affairs (MHA). Kane ka aiñ kaba buh jingkulmar, kaba ai ïa ka bor kaba khraw sha ki bor pahara, la pynjlan sa shibnai ha Dimapur, Niuland, Chümoukedima, Mon, Kiphire, Noklak, Phek, bad Peren, ryngkat bad ki jaka kiba don hapoh 21 tylli ki thanat pulit ha kylleng ki san tylli kiwei pat ki distrik.
Ha ka jingpynlait khubor, u President ka NSF u Medovi Rhi bad u General Secretary u Chumben Khuvung ki la pynrem jur ïa kane ka rai kum ka “jingshim khia kaba leh shiliang” jong ka sorkar India kaba iehnoh ïa ki jingdawa ba la slem jong ki paid Naga ban weng noh ïa ka aiñ “Draconian”. Ka seng ka la kynthoh ba ïa ka AFSPA la pyndonkam kum ka atiar ban pynshitom beiñ, ban pynduh ïa ki hok longbriew manbriew ba kongsan bad ban pynmih ïa ka jingtieng jingsyier hapdeng ki jaitbynriew Naga la bun phew snem.”Wat la ka don ka jingsuk kaba khyndiat eh bad ka jingkiew kaba paw ha ka jingïakren ha ki kam saiñ pyrthei jong ki Naga, hynrei ka jingpynjlan ïa ka AFSPA ka phah ïa ka khubor kaba shai ba ka sorkar India kam kwah ban ithuh ïa ki jingangnud bad ki hok jong ki Naga.
Ka jingpynjari be-aiñ ïa ka AFSPA ka dang ïai bteng ban pynjah burom ïa ka jingïaleh jong ngi ban rai hi dalade bad pynthut ïa ka jingnang kyntiew ïa ka jingshaniah bad ka sorkar India,” la ong ka tyllong khubor kaba la wan na ka NSF. Ka seng jong ki samla pule ka la kyntait ïa ka jingpynpaw ïa ka Nagaland kum ka “jaka ba la don ha ki jingkulmar” bad ka la kynthoh ïa ka jingbym don ka jingïamir jingmut bad ki sengbhalang jong ka Naga ne ki nongmihkhmat jong ka thaiñ shwa ban shim ïa ka rai.
“Ka jingbteng ban pyntreikam ïa kane ka aiï kaba tyngeh ka pynjur tang ïa ka jinglong marwei jong ki briew jong ngi na ka jylla India bad ka pynduh ïa ka jingkyrmen ban ïoh ïa ka jingpynbeit kaba suk bad kaba pynneh ïa ka jinglah ban weng ïa ki jingeh ha ka saiñ pyrthei jong ki Naga,” la bynrap biang ka NSF.
