Imphal, Risaw:
Ki shipai ba ïatreilang ki la ïoh ban kem ïa u Moiranthem Adita Singh ha Sawombung Khunjao ha Imphal EastKa jingkhynra ba la ïalam da ki bor syntiat ha Churachandpur ka la khanglad ïa kawei ka kali Bolero lieh kaba suba.
Ki pulit ka Manipur ki la kem ïa uwei u dkhot ba trei shitom jong ka Revolutionary People’s Front (RPF) bad ka kynhun shipai jong ka, ka People’s Liberation Army (PLA) ha Imphal East district ha ka 27 tarik, Risaw.
Ïa une uba shah kynnoh la tip kyrteng kum u Moiranthem Adita Singh uba la tip ruh da ka kyrteng kum u Toto, 20 snem ka rta, u khun jong u M. Premananda Singh bad uba shong ba sah ha Lamlai Awang Leikai bad la kem ïa u ha Sawombung Khunjao da ka kynhun ba ïatreilang jong ka CDO, Imphal East, bad ka 28 Assam Rifles.
Ha ka jingkhynra ba kyrpang ha ka miet jong ka 26 tarik u Risaw, ka kynhun ba ïatreilang jong ki pulit jong ka Churachandpur District, ka 129 Battalion jong ki pulit ka Central Reserve Police Force (CRPF) bad ki shipai 5 Assam Rifles ki la pynlong ïa ka jingkhynra kaba pynshong nongrim ha ka jingsyntiat ha ka shnong Kingkin kaba don hajan ka M. Songgel kaba don ha Churachandpur distrik.
Ha kane ka jingkhynra, ka kynhun ka la bat ïa kawei ka kali Bolero kaba lieh kaba suba bad ka la pynlong ïa ka jingtalasi, ha kaba la lap ïa kawei ka suloi AK-series ba la shna da ki bar ri, kawei ka suloi MA1 ba la shna da ki bar ri, 240 tylli ki tiar siat bapher bapher bad ar tylli ki pla plastik kiba shai kiba don kumba 1.027 kg u brown sugar, uwei na ki jingdih pynbuaid.
Uwei u briew uba la tip kyrteng kum u Letkhothang Khongsai, 23 snem ka rta uba na ka shnong D. Lhangjol u la shah kem ha kane ka jingkhynra. Ha ka jingtohkit ba nyngkong, la ïathuh ba u la pynpaw ba u dei u dkhot jong ka Kuki National Front (Military Council), lane ka KNF (MC), ka kynhun kaba hap hapoh ka jingkhmih jong ka Suspension of Operations (SoO) Agreement.
Ha kane ka jingkhynra la kurup ïa ki tiar siat, ki jingdih pynbuaid bad ka kali.
