Itanagar, Risaw:
U Myntri Rangbah jong ka Arunachal Pradesh u Pema Khandu, ha ki khyndiat sngi jong ka taïew ba la lah, u la ong ba ki jingpynkheiñ aiñ ha khappud India bad China kim dei kiba dang thymmai bad pynskhem ba ki shipai India ki pahara bha ïa ki khappud jong ka ri.
Haba ïakren bad ki lad pathai khubor ha shilynter jong ka International Tourism Mart kaba 14 na ka bynta ka thaiñ Shatei Lammihngi, la kylli ïa u Khandu hato ka jingïakynad ha khappud ka lah ban ktah ïa ka kam jngohkai pyrthei ha Arunachal Pradesh.
U Myntri Rangbah u la ong ba ka China kam shym la ithuh ïa u McMahon Line, kaba wanrah ïa ki jingeh ba ïadei bad ki khappud ba man ka por ha shilynter u pud ba jrong jong ka Arunachal Pradesh bad ka ri ba marjan.
“Teng teng kine ki mat ki ju jia. Naduh hangne ruh ki shipai ki ïaid sha kata ka liang, bad na ka liang jong ki ruh ka jingpahara ka jia. Kane ka dei ka jingpynkheiñ aiñ, ym ka jingwan rung tuh, bad kane kam dei ka kam kaba thymmai,” la ong u Khandu.
U la pynpaw ïa ka jingshaniah ha ka jinglah jong ki shipai India ban ïada ïa ki khappud jong ka ri, da kaba ong ba katei ka kynhun ka pahara bha ïa ki khappud.
